25.06.2012, 12:24 Гетлин побрз од Геј на 100 м
Џастин Гетлин обезбеди настап на Игрите во Лондон со победата на 100 метри во американските квалификации со време од 9,80 секунди
Осум години по освојувањето на златниот олимписки медал и две години по одлежувањето на четиригодишната суспензија поради допинг, Џастин Гетлин обезбеди настап на Игрите во Лондон со победата на 100 метри во американските квалификации со време од 9,80 секунди. Тоа е втората најдобра стотка сезонава по 9,76 сек. на Јусеин Болт и личен рекорд на 30-годишниот Гетлин, чиј што досегашен најдобар резултат беше 9,85 сек. и со него тој го освои златото во Атина.
Геј, кој се врати на патеката по операцијата на колкот и речиси едногодишната пауза, исто така изгледа подготвен да се носи со светската спринтерска елита во Лондон, финиширајќи втор со 9,86 сек. Поранешниот јуниорски колеџ-шампион Рајан Бејли ја зграпчи третата олимписка виза со 9,93 сек., а освојувачот на бронзениот медал на ОИ 2008, Волтер Дикс, заврши последен со 10,95 сек. поради проблемите со нозете што го мачат подолго време.
|
