Крај уште на почетокот за Бердих

Финалистот на Вимблдон од пред две години елиминиран во три сета од Летонецот Гулбис

Финалистот на Вимблдон од 2010 година и шести носител годинава Томаш Бердих е најнепријатното изненадување на првиот ден од машкиот дел од неофицијалното светско првенство во тенис. Ернест Гулбис (23) од Летонија, 87. на АТП-листата, го елиминира Чехот со 7-6, 7-6, 7-6. Гулбис покажа сензационална игра, а многумина веќе сметаат дека ќе го надмине успехот од пред четири години, кога стигна до четвртфиналето на Ролан Гарос.

„Кога ја видов ждрепката, бев пресреќен. Сакав да играм уште на стартот со голем противник. Тоа ме мотивираше уште повеќе. И да беше некој повисоко рангиран тенисер, немаше да имам проблем со тоа“, изјави младиот Гулбис пред новинарите.

Голем дел од заслугите имаше и неговиот нов тренер Гантер Бресник, а старите видеа од играта на Бердих и дополнителните тренинзи беа причината за изненадувачката победа на Летонецот, кој пред две години во Скопје загуби од Лазар Магдинчев во рамките на Дејвис купот.

„Морам да признаам дека на тренинзите ми беше напорно, но, сепак, ги увидов слабостите на мојот противник на видеата и тоа беше причина за мојот триумф. Многу е едноставно - ако тренираш напорно, резултатите ќе дојдат сами по себе, ако не, тогаш не можеш да се надеваш на успех. На тренинг можам да победам секого, но на турнир е сосем поинаку. Сфатив дека треба да играм порелаксирано затоа што преголемото размислување може да те чини скапо на теренот“, додаде Гулбис.

Резултати од првото коло, мажи: Федерер (3., Швајцарија) - Рамос (Шпанија) 6-1, 6-1,6-1; Типсаревиќ (8., Србија) - Налбандијан (Аргентина) 6-4, 7-6, 6-2; Монако (15., Аргентина) - Маер (Германија) 6-4, 7-6, 7-6; Долгополов (22., Украина) - Богомолов (Русија) 6-3, 6-4, 7-5;

Истомин (Узбекистан) - Сепи (23., Италија) 6-7, 6-4, 3-6, 6-3, 8-6 итн. Жени, прво коло: Шарапова (1., Русија) - Родионова (Австралија) 6-2, 6-3; Кириленко (17., Русија) - Каданту (Романија) 6-3, 6-1; Клајстерс (Белгија) - Јанковиќ (18., Србија) 6-2, 6-4; Петрова (20., Русија) - Камерин (Италија) 6-0, 6-2 итн. (Љ.В.)