26.06.2012, 15:24 (ЕП ВЕСТИ) Две години суспензија за Самир Насри?
Причина за тоа се недоличните зборови што фудбалерот ги упати кон новинарите по поразот од Шпанија во четвртфиналниот дуел на ЕП
Играчот од средниот ред на француската репрезентација Самир Насри би можел да направи голема пауза во националниот дрес бидејќи на играчот на Манчестер Сити му се заканува драконска казна од две години неиграње за „галските петли“. Причина за тоа се недоличните зборови што фудбалерот ги упати кон новинарите по поразот од Шпанија во четвртфиналниот дуел на ЕП.
Насри од почетокот на првенството со своето однесување го привлече вниманието кон себе, а се' почна кога го стави прстот преку уста по постигнатиот погодок во првиот натпревар со Англија, со цел да ги замолчи критичарите на неговата игра.
Кол и Јанг цел на расизам
Двајцата англиски трагичари Ешли Кол и Ешли Јанг беа цел на расистички напади на социјалната мрежа „Твитер“, откако обајцата не успеаја да ја затресат мрежата на Џанлуиџи Буфон во пенал-серијата по мечот Англија - Италија во четврт-финалето на Европското првенство. Натпреварот беше следен на телевизија од 25 милиони гледачи во Велика Британија, а лондонската полиција смета дека расистичките навреди доаѓаат од „Твитер“ со база стационирана во Лондон.
Германците казнети поради неонацизам
Германската фудбалска федерација е казнета втор пат на ЕП од страна на УЕФА, овој пат со парична глоба од 25.000 евра поради недоличното навивање на германските навивачи за време на натпреварот со Данска, кој „панцирите“ го добија со 2:1. Германските фанови во овој дуел запалија факели и фрлаа петарди, а се појавија и со транспаренти со неонацистичка содржина, и покрај предупредувањата и кампањата на УЕФА против расизмот пред почетокот на ЕП.
Кјелини се врати на тренинзите
Италијанскиот дефанзивец Џорџо Кјелини се врати на тренинзите по повредата што играчот на Јувентус ја доби на мечот со Република Ирска. Централниот одбранбен играч би можел да биде подготвен за полуфиналниот дуел со Германија. Тој го пропушти четвртфиналниот меч со Англија, а со неговото враќање во тимот се зголемија опциите во изборот на Прандели за последната линија ако се земе предвид неиграњето на Маџо поради суспензија, а под знак прашалник е ставен и настапот на Игнацио Абате и на Даниеле де Роси поради повреди.
Фурсенко поднесе оставка од РФУ
Првиот човек на Руската фудбалска федерација, Сергеј Фурсенко, поднесе оставка од функцијата по неуспехот на репрезентацијата да ја помине фазата по групи на ЕП. Русија во групата А заврши на третото место, откако во последното коло беше совладана од Грц��ја со 1:0.
Фурсенко, во друштво на рускиот претседател Владимир Путин, се извини за неуспехот на руската репрезентација.
„Би сакал да им се извинам на сите руски фанови за ваквиот резултат. Знам дека ова е голем удар за руските граѓани“, му соопштил Фурсенко на Путин.
Фурсенко (58) за претседател на РФУ беше избран во февруари 2010 година, откако претходно си замина од функцијата прв човек на Зенит од Санкт Петербург.
Срби го хакирале сајтот на ХНС
Српски хакери успеале да влезат на веб-страницата на Хрватскиот фудбалски сојуз (ХНС) и да го стават српското знаме. Покрај него, напишале порака, а постирале и видеоклип од натпреварот меѓу Хајдук и Зенит. На видеото се слушаат песните и пораките од гостинските навивачи, при што се слушаат и извици од типот „убиј ги усташите“.
|
