Владата ги спрема куферите за Германија и за Британија

Сега е во Индија, а веќе е договорено на 25 март да отпатува на бизнис-форум во три града во Германија и во Лондон

Маја Томиќ


Не запира агресивната владина турнеја низ светот за привлекување инвестиции. Додека се' уште трае роуд-шоуто во Индија и во Малезија, каде што вчера се посетија Мумбај и Пуне, центарот на автомобилската индустрија, веќе е направен планот за следната турнеја во потрага по инвеститори. Делегација на Владата ќе отпатува на 25 март во Германија, па во Лондон. Во Германија ќе се посетат три града, Штутгард, Дизелдорф и Хановер, каде што промоторите веќе оствариле контакти со некои компании. Во Лондон, пак, владина делегација ќе престојува еден ден и таму ќе одржи британско-македонски форум во претставништвото на „Дојче банк“, кое бесплатно ни ја понудило салата за состаноци.

„Делегацијата ќе ја предводи вицепремиерот за економски прашања Владимир Пешевски, а ќе присуствува и министерот за странски инвестиции Веле Самак. Сите овие посети се организирани од нашите промотори кои имаат остварено контакти со повеќе компании. Од нашата претходна посета веќе има многу заинтересирани британски компании за инвестирање во земјава и со нив повторно ќе се сретнеме на 30 март. Што конкретно ќе произлезе од средбите и кои се имињата на компаниите, сега е рано да се зборува“, вели директорот на Агенцијата, Висар Фида. Тој додава дека веќе е испратена покана до британски бизнисмени да присуствуваат на форумот, но засега е уште рано да се каже нивната точна бројка.

Инаку, во Македонија, поточно во зоната „Бунарџик“, веќе работи британската „Џонсон Мети“, а деновиве и „Бордерлес Еуропе“ го презеде радовишки „Голдмак“ и најави нови вработувања. Како што веќе објавија медиумите, зделката е резултат на посетата на принцот Мајкл од Кент, кој во јануари предводеше британска бизнис-делегација во Македонија во која имаше и претставници од оваа компанија. Од „Бордерлес Еуропе“ најавија проширување на капацитетот и зголемување на услужната дејност на „Голдмак“, според барањата на странските клиенти.

Во исчекување на претстојното владино роуд-шоу во Германија и во Лондон, Македонија веќе покажува интерес за поголема соработка со британски бизнисмени. На вчерашниот форум во Скопје за мрежно поврзување на компании од двете земји присуствуваа фирми од земјоделството, градежништвото, финансиски услуги, осигурување, информатичка технологија, безбедноста на патиштата и иновациите. Тие сектори се оценети како потенцијални за интензивирање на соработката. Со поддршка на Сојузот на стопанските комори и Амбасадата на Обединето Кралство, во рамки на форумот директни средби остварија 45 македонски и 16 британски фирми. Според вицепремиерот Пешевски, соработката меѓу Македонија и Велика Британија станува се' поинтензивна, а нови инвестиции биле најавени и при посетата на војводата од Кент. „Тогаш почнаа и определени контакти кои очекуваме наскоро да резултираат со конкретни инвестиции. Владата лани во Лондон веќе еднаш ги презентира можностите за инвестирање, а на крајот на март повторно ќе учествува на бизнис-форум. Целта е да се водат директни разговори за соработка меѓу компании, но и да се зголеми трговската размена и трансферот на знаење“, рече Пешевски.

Британската Амбасада ја поддржува Владата со неколку проекти меѓу кои и оној за процена на регулативата врз влијанието на бизнисот, кој предвидува пред носење на секој закон да се прават детални анализи за ефектите од неговата имплементација.