Според Арифи, Македонија постигнува успеси

Вицепремиерката Теута Арифи и еврокомесарот за проширување, Штефан Филе

Вицепремиерката Теута Арифи на дебатата за Македонија во Брисел, насловена како „Дали можеме 2012 година да ја претвори��е во година на успех?“, тврдеше дека евроинтеграцијата на Македонија ја поддржуваат сите политички партии, граѓанското општество и граѓаните, па Владата затоа си го постави членството во ЕУ како врвен приоритет. Но, од друга страна, како што рече Арифи, знаејќи дека тоа е условено со исполнување на Копенхашките критериуми, со посветеност и ентузијазам се работеше на воведување на европските стандарди во општеството, а позитивните резултати беа неминовни.

„За десет дена ќе се отвори ново поглавје во односите меѓу Македонија и ЕУ со почнувањето на стратешкиот пристапен дијалог. Знаеме дека тоа не е замена за преговорите, но веруваме дека отворањето на две толку важни поглавја како што се поглавјата 23 и 24 ќе ни даде можност да покажеме дека сме одлучни да ги имплементираме реформите во осетливи области како што се судството и фундаменталните права и правдата, слободата и безбедноста“, рече Арифи.

Дијалогот на високо ниво со македонскиот премиерот Никола Груевски што ќе се одржи во Скопје, според еврокомесарот за проширување Штефан Фуле, не претставува супститут на преговори. Тој, според Филе, претставува мост до отпочнување на преговорите. Тој ги наведе клучните поенти од поглавјата 23 и 24, а кои според досегашната пракса на ЕУ се отворале откако ќе почне процесот на преговори.

„Сепак клучното прашање останува името на државата, проблем кој треба најитно да се реши“, рече Филе.

На дебатата која се одржа во Европскиот парламент, присуствуваа пратеници во ЕП, претставници на Европската комисија и на тинк-танк организации со седиште во Брисел. Дебатата беше организирана во соработка со европратеникот Ричард Ховит, известувач за Македонија во ЕП.