Мое ќоше

Седум скопски чуда

Ерол Ризаов

На Вардар гемија, а во гемија окован делија

Гемиите ќе допловат по Вардар како што високо на планината Арарат по големиот потоп вплови коработ на дедо Ное и го спаси човештвото. Скопје нема море, ама ќе има кораби и гемии на кои ќе веслаат оковани делии. Ем ќе веслаат на суво ем ќе пеат: бор садила мома Евгенија. Нашиот неуморен градоначалник Коце Трајановски ќе му подари на Скопје уште едно чудо невидено. Во земјата на Библијата чудата се толку вообичаени што веќе кај нас дома никого не изненадуваат. Шашардисани и вџашени се само простосмртните и нормални луѓе од остатокот на светот. Има ли нешто понормално на света земја и по плитка, но света река да пловат бродовите, авионите да одат по улици, автомобилите, автобусите и камионите да летаат, а возовите да одат пеш. За само три дена до Солуна града. Што е толку чудно ако по бунарот на св. Павле откај Паљурци до Скопје стаса првата подморница која оди под земја.

Читам градоначалникот Трајановски ќе го прослави својот роденден на гемијата на Вардар. Предлагам првиот брод на Вардар да се направи ист како Гвадалкивир, францускиот брод кој во солунското пристаниште го потопи славниот гемиџија Павел Шатев. Во капетановата кабина зад кормилото би можело да стои восочна фигура на Павел Шатев, една од најинтересните, најмистични и највозбудливи големи историски личности на Македонија.

Еве го сега списокот на седумте најстари светски чуда и мојот список на скопските чуда, а вие гласајте по ваш избор.

Значи, како што запишал историчарот Херодот, првото светско чудо е Артемидиниот храм во Ефес, денешна Турција. Го имам посетено неколку пати и да ви кажам право воопшто не ми беше толку возбудливо од урнатините и малите скромни остатоци на некогашниот импозантен храм. Некако не ми изгледаа како чудо големо како што е тоа најголемиот на светот споменик на Александар Македонски. Мојот избор на Артемидиниот храм да го спротивставам споменикот на Александар како најголемо скопско чудо не е случајно. Има тука големи совпаѓања. Во ноќта на 21 јули 356 година пред нашата ера некој човек познат во историја како Херостратус го запалил храмот за да с��ане славен. Тоа и се случило. Храмот изгорел до темел, а Херостратус станал славен по зло. Божицата таа вечер не спиела дома и не можела да го изгасне огнот. Плутарх запишал дека божицата Артемида таа вечер присуствувала на раѓањето на Александар Македонски. Само по 20 години Александар го обновил храмот на божицата Артемида. А по цели 2.367 години Никола Груевски го врати дома Александар Македонски качен на Букефал. Може ли тоа да биде случајно. Нели е тоа најголемо светско чудо.

Натаму се' е лесно: Висечките градини во Вавилон се обични урнатини и таму нема ништо интересно. Нашето скопско Кале за нив е ремек-дело. Од Колос на Родос денес нема ни трага, затоа Филип Втори штом дојава пред Ибни Пајко, ќе биде повозвишен од Колос како и секогаш. Статуата на Зевс заедно сосе Олимпија не може да се мери ниту со Арената „Филип Втори“ ниту со Уставниот суд на Македонија. Во Арената „Филп Втори“ има близу 40.000 седишта кои еднаш на пет години ќе се полнат кога ќе дојде Цеца од Белград, а во импозантниот Уставен суд со големи канонади и високи столбови по 20 метри ќе работат неколку судии кои како нотари ќе ги заверуваат законите на Владата. Ајде кажете каде има вакво светско чудо на друго место. Мавзолејот во Халикарнас, кај Бодрум, е детска играчка спрема нашиот Мавзолеј на борбата на ВМРО и жртвите од комунизмот. На Светилникот на Фарос кај Александрија одамна нема драма. Драмата е во нашиот Стар театар кој порасна ненадејно двојно поголем отколку што беше.

Проблем се само големите пирамиди во Гиза и во Египет. Тие се уште недостижни. Но, и на тоа се работи во сто чекори. Распишан е тендер. Бидете стрпливи. Ќе имаме и пирамиди. Кој има бродови на суво, ќе има и пирамиди. Па, нели тие се градат во пустина.