Водно претесно и за планинарење и за велосипедизам?

Планинари ги уриваат штиците и земјата потребни за симулирање на велосипедската патека

Миркица Поповиќ


Ќе ја доживее ли Македонија првата меѓународна трка во екстремен велосипедизам? Натпреварот е најавено да се одржи на 3 и 4 октомври на Олимписката патека од Крстот до Средно Водно, во организација на велосипедскиот клуб „Евил бајкерс тим“. Меѓутоа, поради недоразбирањето на организаторите со група планинари, неизвесно е дали трката ќе се одржи според замисленото сценарио.

Неколкумина планинари веќе неколку недели ги уриваат штиците и дополнителната земја потребни за симулирање на велосипедската патека за екстремно возење. Организаторите имаат уредно обезбедени дозволи за поставување на градбите од Градот Скопје од Министерството за животна средина. Градот и градоначалникот Коце Трајановски се главни поддржувачи на настанот, а официјална поддршка за трката има и од Агенцијата за млади и спорт, ЈП „Паркови и зеленило“ и Велосипедската федерација на Македонија.

„Се обидовме да разговараме со планинарите и да им објасниме дека овие градби се од привремен карактер. Ние имаме обврска три дена по завршување на натпреварот да ја вратиме патеката во нормалната состојба“, вели Лазе Миновски, главен организатор на настанот.

Велосипедистите повеќе пати се обиделе и преку разговор и преку печатени молби поставени на знаците на патеката и во Планинарскиот дом на Водно да замолат да престане уништувањето на градбите, но не наишле на разбирање. Миновски го пријавил случајот во полициската станица „Карпош“ и предупредил за опасноста од потенцијален инцидент на денот на натпреварот поради ова недоразбирање.

„Едноставно, овие луѓе не сакаат да покажат спортски дух, не се однесуваат фер. На кривините на кои треба да се постават штици и земја за да се подобри патеката за возење работат само двајца волонтери од велосипедскиот клуб. Буквално на рамена ги качуваме материјалите до врвот на Водно“, изјави Миновски, појаснувајќи дека за време на натпреварот патеката ќе биде означена со трака и ќе има редари кои ќе внимаваат.

Од Градот Скопје велосипедистите пред неколку години добиле ветување дека до 2010 година ќе се направи нова велосипедска патека за обичен и екстремен велосипедизам на Водно со цел да се одделат велосипедистите од планинарите. „Градот рече дека ќе не' земе предвид во нивната програма за која се одлучува во ноември, со што Скопје ќе стане официјален домаќин на трката. Водно е недоволно искористено и им припаѓа на сите. Не ја земаме патеката од планинарите, едноставно сакаме да ја користиме два дена за овој натпревар“, објаснува организаторот од „Евил бајкерс тим“.

Вакви екстремни велосипедски трки постојано се одржуваат во многу европски земји. Самиот Миновски учествувал на неколку трки во Словенија. „Скијачките патеки во Австрија летно време се користат како велосипедски патеки“, објаснува Миновски.

Велосипедската трка е меѓународен карактер и се очекуваат гости од Словенија, Босна, Србија, Бугарија. Покрај натпреварот во екстремен „даунхил“, на Средно Водно ќе бидат поставени штандови на различни спортски клубови за сноуборд, параглајдерство, алпинизам и нуркање, со цел промоција на клубовите за екстремни спортови меѓу граѓаните.