Мое ќоше

Груевски го исчисти снегот

Ерол Ризаов

Чистењето на снегот стана најбизарната и најглупава политичка кампања

Благодарение на Владата и на мудрата политика на премиерот Никола Груевски, успешно е совладана големата снежна бура и ви��лица. Сите други околни држави Србија, Бугарија, Грција..... и цела Западна Европа паднаа на испитот. Останаа завеани патишта, испаднаа возови од шини, затворени аеродроми, пукнаа брани, се удавија луѓе, стотици бездомници останаа замрзнати по градските улици, се' уште се отсечени цели региони, страшен хаос насекаде околу нас. Само Македонија со извонредна организација, пожртвуваност и храброст на владините елитни служби и единици спречија државата да биде окована во мраз. Се' функционира извонредно добро, компаниите работат, децата одат на училиште, снабдувањето е нормално, освен скопска „Топлификација“.

Ова е резимето од најбизарната и најглупава политичка кампања која досега ја имам видено и чуено. Наслушнав дека конечно Никола Груевски им свикал на своите апологети аман не бранете ме и кога врне снег среде зима.

А, што се случи во суштина. Ништо посебно, исто што и со ланскиот снег. Вчера првпат по седум дена скопјани и граѓаните на повеќе македонски градови го видоа асфалтот. Во главниот град наврнаа одвај цели 15 сантиметри снег доволно целиот да се парализира. Во ниту еден поголем град во Македонија нема повеќе од 20 сантиметри снег. Како што снемуваше сол и не се чистеа улиците, така растеше медиумската кампања дека се' е во најдобар ред. Градовите на телевизија почнаа да функционираат беспрекорно. А, селата и повисоките населени места каде што има над половина метар снег се целосно завеани и така ќе биде додека не се стопли времето. Патиштата ќе станат проодни некаде во рана пролет, а може и порано ако дувне југо.

Комуналните претпријатија во Македонија и сите градски надлежни служби работат како така само до 5 сантиметри снег и до 0 Целзиусови степени температура. Ќе посипаат малку сол и работата е завршена. Над 15 сантиметри снег и на минус под нулата улиците и патиштата ги чистат телевизиите со своите извештаи од теренот каде што се' е во најдобар ред.

Се сеќавам во едноумието најмладите новинари во градските рубрики беа задолжени за комуналните претпријатија. Тоа беше така до првиот снег, или временска непогода. Тогаш на сцена стапуваа уредниците и тешката артилерија. Сите што не можеа да удрат по коњот, ќе удреа по самарот. Мајка ќе им расплакаа на директорите на комуналните претпријатија, на „Жито лукс“, на „Топлификација“, „Електродистрибуција“, „Водовод и канализација“, Сообраќајна полиција, Градска чистота, на извршните совети на градовите и нивните претседатели, градоначалниците и останата ситна боранија. Се бараше одговорност и оставки... заседаваа штабови, градски комитети, владата...

Цел театар за десетина зимски дена во годината. Ако ме прашате лично, за неколку снежни дена во годината не би правел никаков проблем ако малку се отежнати и забавени работите. Тоа е сосема нормално кога ќе падне снег во медитеранско подрачје.

Но, сега ситуацијата е сосема поинаква иако на терен пак истрчува првата новинарска гарнитура, а некаде лично и главните уредници. Се монтираат 3-Д наочари на целата нација и на ТВ-камерите и почнува филмот во живо што се вика „Цел свет е окован во мраз, само ние сме слободни“. Се' е под контрола во Македонија, дури и снегот. Природата и нејзините каприци што сите ги прави немоќни кај нас не проаѓаат. Поарна пропаганда не може да смисли ни агитпроп, па ни најголемите националсоцијалисти.

Единствена енигма е „Топлификација“. Како кога сите функционираат беспрекорно на 15 сантиметри длабок снег и на минус 5 Целзиуси, надвор од стадото останува само една црна овца. Веројатно има нешто многу жешко што не се вклопува во зимската идила на власта како со другите комунални компании. Не оти мислам дека „Топлификација“ заслужува пофалби, напротив, мислам дека има место за сериозна критика на оваа монополски поставена компанија. Но, многу ми е сомнителна повеќемесечната жестока кампања само против неа, изземајќи ги сите други кои од сиромашни комуналци кои одвај преживуваа сега се однесуваат спрема граѓаните како друмски разбојници. Да не се намерачил некој од власта да и' конфискува дел од имотот. На повидок е или нова национализација на тазе приватизација или грабеж на туѓ имот.