07.11.2012, 14:06 Српската полиција го уапси „газда Нини“
Во акција на српската Криминалистичка полиција е уапсен Јовица Стефановиќ-Нини, поранешен генерален директор на фирмата „Југоремедија“ и сопственик на радовишката „Јака 80“ и нишката фирма МД „Нини“.
Освен Стефановиќ, кој е уапсен во Ниш, полицијата ги привела и Златко Марковиќ, поранешен директор за организациски, економски и правни прашања во „Југоремедија“, која се занимава со производство на лекови, и Олга Антиќ, актуелна директорка на фирмата „Нини ДОО“. Сите приведени се сомничат за злоупотреба на службената положба, односно дека му овозможиле на „газда Нини“ да се стекне со притивправна имотна корис�� од 7,5 милиони евра. Со досегашната истрага било утврдено дека фирмите на Нини, од компании во Италија, Швајцарија и Германија, набавувале суровини за потребите на „Југоремедија“, но во повисоки цени.
Во приказната која сега директно се поврзува со името на „газда Нини“ се споменува и радовишката „Јака 80“, која, наводно, во 2003 година требало да ја доврши декапитализацијата токму на „Југоремедија“, но се' завршило со конверзија на долгот со акции, а до финансиската „була“ дошло со набавка на суровини за производство на лекови. Како што пренесуваат белградските медиуми, докапитализацијата на „Ремедија“ се случува три години подоцна, но се' дотогаш со неа раководи Стефановиќ.
Пред неколку месеци, полицијата уапси уште неколку лица кои се поврзуваа со работењето на „Ремедија“, поради тоа што ја оштетиле компанијата за 600.000 евра. Поточно, во август годинава беа уапсени в.д. генералниот директор и финансискиот директор на „Југоремедија“, в.д. директорот на „Луксор фармација“ и на „Панфарм“, како и еден судски вештак.
Во меѓувреме, „газда Нини“ е инволвиран и во скандалот со приватизацијата на „Срболек“, при што се споменува дека оваа фирма успеал да прибави корист од пет милиони евра. Тој, набрзо по апсењето беше ослободен од обвинувањата, но во тамошната јавност останаа кажувањата дека „Југоремедија“ и „Срболек“ се меѓу најспорните приватизации. (Љ.С.)
|
