Се опремува фабриката што ќе произведува за „Мерцедес“

Во „Дрекслмајер“ почнаа вработувањата и обуките, но не стивнуваат коментарите за платите

АНГЕЛ ДАНОВ


Кавадарци - Големата инвестиција со уште поголеми очекувања кај граѓаните од тиквешкиот регион почна да се реализира. На царинскиот терминал во Кавадарци почна да пристигнува опремата за новата фабрика „Дрекслмајер“, а веќе се вработени и првите работници и менаџери. Дел од нив завршија со едномесечната обука во Романија и Германија, па сега наученото ќе им го пренесуваат на работниците во Кавадарци. Како што рече претседателот на Советот на Кавадарци, Илија Тренчев, менаџерскиот тим на компанијата планира до крајот на годината во фабриката да бидат вработени повеќе од 300 луѓе.

На почетокот интересот за работно место во оваа германска фабрика која ќе произведува делови за „Мерцедес“ беше повеќе од голем и граѓаните постојано прашуваа како да се дојде до работа. Илјадници невработени, но и вработени во други фирми аплицираа на огласот кој го објави Агенцијата за вработување во Кавадарци, сите со надеж дека ќе бидат повикани на разговор и примени на работа. Приоритет при вработувањето имаат оние кои знаат странски јазик, кои се високообразовани, како и лицата чие образование е блиско со она што ќе се работи во фабриката во која ќе се произведуваат кабелски инсталациски системи и електронски компоненти за автомобилите на „Мерцедес“.

Според првичните најави, компанијата ќе вработи 4.000 луѓе и тоа прво од Кавадарци и Тиквешијата, а доколку не бидат обезбедени потребните кадри, работници ќе се бараат и од Прилеп и Велес.

Новата фабрика, како што ја нарекуваат кавадарчани германската инвестиција, и понатаму е топ-тема. Се коментира при секоја средба меѓу граѓаните, пријателите роднините. Се бараат врски преку пријатели и партии, само да се стигне до работа, а некои дури и се преквалификуваат само да успеат да влезат во фабриката. Но, се чини, сепак, некои работи не се како што се замислуваше и ветуваше. Деновиве најкоментирана тема во Кавадарци е платата што ќе ја добивале оние што ќе се вработат, како и условите за работа. Се шпекулира дека примените ќе земале 9.000 денари со платени придонеси, превоз и храна. Ќе се работело во три смени, сабота и недела ќе биле неработни, а за работа на празник ќе се исплаќале празнични дневници.

И, додека некои велат дека се' уште е рано да се зборува за платата, бидејќи не е почнато производството, туку само се врши обука за идните работници, други сметаат дека ако има вистина во ваквите шпекулации, тогаш се работи за минимална плата колку што се исплаќа во Македонија што е далеку од нивните очекувања. Коментираат дека сите се свесни оти странските инвеститори доаѓаат да инвестираат во Македонија само поради евтината работна рака. Но, и покрај се', граѓаните и натаму очекуваат дека оваа германска компанија ќе ја раздвижи македонската економија и ќе ја намали армијата невработени, пред се' во Тиквешијата.

За шпекулациите околу висината на платата се обидовме да добиеме официјална информација од канцеларијата на „Дрекслмајер“ во Кавадарци. Но, од таму ни беше ветено дека одговор на прашањата ќе добиеме од понеделник.