Гутен таг, фрау Меркел!

Груевски во вторник во премиерска посета на Меркел во Берлин. Средбата Груевски - Меркел се смета за клучен потег на македонската надворешна политика пред самитот на НАТО во Чикаго

Соња Крамарска


Премиерот Груевски во вторник во Берлин треба да се сретне со канцеларката Ангела Меркел. Македонскиот државен врв забрзано прави подготовки за оваа важна средба. Се прави списокот на прашања што треба да бидат опфатени во разговорите, иако како што е вообичаено дипломатските канцеларии на двете земји, ја усогласуваат агендата уште пред да дојде до средбата на политичките првенци.

Владини извори наведуваат дека тема на разговорите ќе бидат претстојниот самит на НАТО во Чикаго и можноста Македонија да се најде на априлската агенда на алијансата. Кога се говори за тоа, централното прашање е спорот со Грција околу уставното име на нашата земја.

Надвор од овие прашања, она што ги спојува Македонија и Германија е малку наспроти она што ги прави различни во секој поглед. Македонија има бруто домашен производ во 2011 близу 10 милијарди долари, што спаѓа во рангот на мали економии. По глава на жител приходот изнесува 9.400 долари. Реалниот раст на бруто домашниот производ во 2011 беше 3,5 проценти. Стапката на невработеност ни' е 31,3 проценти.

Германија е најголемиот трговски партнер на Македонија. Со бруто домашен производ од 3,5 билиони долари, или годишен приход по глава на жител 40 илјади долари и стапка на невработеност од 6 проценти, Германија е една од најсилните економии во светот и земја економски лидер на Европа. Нејзината улога во должничката криза се смета за клучен фактор во нејзиното менаџирање и решавање.

Во Германија живеат околу 62 илјади Македонци, главно во Баварија, Берлин, Хановер и Штутгарт. Според македонски извори таа бројка е 85 илјади. Но, тие нема да бидат тема на разговорите Груевски - Меркел.

Претстојната посета на Груевски на Берлин е втора средба од таков ранг со канцеларката Меркел. Првата беше во октомври 2006, веднаш по неговото стапување на функцијата премиер на Македонија. Меркел тогаш беше премиерка со стаж од само една година. Тридневната посета на Груевски на Германија тогаш беше со надеж дека Македонија ќе ја добие поддршката на Берлин при зачленувањето во ЕУ и НАТО. Тогаш Меркел рече дека Германија сака да им осигура на балканските нации добра патека кон иднината, но не даде никакви сигнали за конкретни чекори кои Скопје може да ги очекува од Берлин, особено во пресрет на претседателството над ЕУ што требаше Германија да го преземе.

По таа посета, оцените на посматрачите беа дека Германија, сепак решила да седи на задното седиште во однос на македонските аспирации за ЕУ и НАТО и особено во спорот помеѓу Грција и Македонија околу уставното име на нашата земја.

Посетата во вторник треба да им даде нов импулс на односите меѓу двете земји. Македонската ВМРО-ДПМНЕ и германската Демохристијанска унија на чие чело е Меркел спаѓаат во редот на десните партии, што подразбира подлабока сестринска соработка. Оваа врска се одржува главно преку фондацијата Конрад Аденауер, која и дава асистенција на ВМРО-ДПМНЕ на секои избори и врши политички обуки на нивното членство.

Груевски е економист, а Меркел е доктор на науки со специјалност по физичка хемија. Заедничко на двајцата е што економијата ја ставија како централно прашање во нивните премиерски платформи. И двајцата предводеа или предводат голема владина коалиција, особено Меркел во првиот мандат, а Груевски во сегашниот кој се смета за трет мандат со оглед на двата циклуси предвремени избори.

Премиерот Груевски веќе беше кон крајот на 2011 во посета на Германија, каде заедно со неколку министри ги презентираа можностите на Македонија за странски инвестициски вложувања. Податоците за германските инвестиции во Македонија не се импресивни, односно тие се проценуваат на 50-тина милиони евра. Средбата Груевски - Меркел се смета за клучен потег на македонската надворешна политика во пресрет на самитот на НАТО во Чикаго во април, и во напорите Македонија да излезе од ќорсокакот во кој западна со грчката блокада на авроатланските аспирации.