Британски принц прв пат во ирска амбасада

Лондон - Британскиот престолонаследник, принцот Чарлс, ја посети амбасадата на Република Ирска во Лондон каде што присуствуваше на приемот посветен на најистакнатите Ирци што живеат и работат во Велика Британија. Ова е прв пат еден член на британското кралско семејство да ја посети ирската амбасада.

Посетата на принцот Чарлс доаѓа во време на се' позасилените најави дека британската кралица Елизабета ќе ја посети Ирска идната година, што би бил прв случај монархот на Велика Британија да го посети Даблин, по стекнувањето на ирската независност во почетокот на дваесеттите години на 20 век. Дедото на Елизабета, кралот Џорџ Петти, е последниот британски суверен што бил крал на Обединетото Кралство на Велика Британија и Ирска.

Можноста кралицата Елизабета да направи таквото „историско патување“ преку Ирското Море во соседна Ирска е повеќепати разгледувано, по потпишувањето на спогодбата од Стормонт и воспоставувањето на мировниот процес во Северна Ирска, но беше оставена настрана од безбедносни причини и во очекување да се зацврсти процесот на помирување во покраината.

Лидерите на главните политички партии во Даблин, како и угледни Ирци во Лондон сметаат дека веќе е време за посета на британската кралица. Претседателката на Ирска, Мери Мек Алис, која беше во приватна посета на Лондон минатата година и се сретна со кралицата, ја најави можноста тоа да се случи набрзо. (МИА)