Опозицијата го напушти Собранието

ВМРО-ДПМНЕ излезе со став дека одлуката на СДСМ за напуштање на Собранието е притисок врз судската власт

Жаклина Хаџи-Зафирова

Опозицијата вчера го напушти законодавниот дом, крајно револтирана поради апсењето на потпретседателот на СДСМ и актуелен градоначалник на Струмица, Зоран Заев, кој се товари за злоупотреба на службената положба поради трговскиот центар „Глобал“ во Струмица. Нервозата во Собранието, СДСМ ја изрази уште во почетокот на собраниската седница, кога лидерката на оваа партија, Радмила Шекеринска, најави дека нема веќе да учествуваат во работата на Собранието поради диктаторското однесување на власта.

„Трендот на уништување на сите оние кои поинаку мислат продолжува. Ние не сакаме да бидеме соучесници во ова убиство на демократијата. Сакате апсолутна власт и диктатура? Продолжете да си ја терате во ова Собрание“, им порача Шекеринска на пратениците, непосредно пред да го напуштат Собранието. Според неа, постојат две причини за апсењето на, како што рече најуспешниот градоначалник, а тие се да се прикрие формирањето на владината коалиција со ДУИ и политички да се елиминираат кандидатите за лидер на СДСМ. Кон ваквата најава за напуштање на Собранието, се придружија и ЛДП, НСДП и Нова алтернатива, по што ВМРО-ДПМНЕ излезе со став дека одлуката на СДСМ за напуштање на Собранието е притисок врз судската власт. Со излегувањето на опозициските партии од собраниските клупи, законодавниот дом практично остана без опозиција. Но, тоа не ги спречи пратениците од владејачката партија и понатаму да носат закони по итна постапка.

Лидерката на СДСМ, Радмила Шекеринска, го оквалификува апсењето на Заев како политички случај, со што се докажало дека Македонија станала полициско-партиска држава. За случајот таа контактирала и со шефот на државата, Бранко Црвенковски, кој, според неа, бил изненаден од ваквата манифестација на моќ и сила. СДСМ за апсењето ги известил странските амбасади и меѓународните организации кои се занимаваат со правна проблематика.

„Сега целото внимание нема да биде врз изборот на владата, туку врз флагрантниот случај на уривање на правната држава. Втората цел е да се испрати порака до сите дека е многу опасно да ти го спомнат името како кандидат за претседател на СДСМ, а не дај боже да станеш претседател на СДСМ“, рече Шекеринска на брифинг со новинарите, додавајќи дека МВР и претходно му поднела кривична пријава за истиот случај, па му се извиниле.

Претходно, од собраниската сала Шекеринска коментираше дека власта со апсењето се обидува да го одвлече вниманието на друга страна. „Затоа, повторно на спектакуларен начин со камери и каубојски трикови е уапсен градоначалникот на Струмица и потпретседател Заев. На ВМРО-ДПМНЕ одамна им пречи што тој е дефинитивно најуспешниот градоначалник во Македонија. Им пречи што постојат луѓе на локално ниво кои покажуваат дека централната власт работи лошо. И затоа мораа да направат нешто да го спречат таквиот тренд“, рече лидерката на СДСМ, Шекеринска, од собраниската сала. Таа рече дека власта има проект да апси луѓе од СДСМ и потсети на судските процеси што се водат и за вториот потпретседател на СДСМ, Јани Макрадули. Шекеринска потенцираше и дека кога таа била кандидат за лидер на СДСМ пред две години била бомбардирана со соопштенија дека ја злоупотребила службената должност и украла странски пари, а била обвинета и за случајот „Мајкрософт“.

„Целта е да не постои опозиција, а таа што постои да се крие по дупки. Тешка е одлуката што ја носиме, но тоа е единствената одлука која ќе ја натера власта да избере или ќе тера тврда и видлива диктатура и за тоа ќе сноси последици или ќе го преиспита своето однесување“, смета претседателката на СДСМ, а на новинарите им порача: „Нас не' испоапсија, сега вие сте на ред!“

Лидерката на СДСМ вели дека е „извадена од кожа“ поради СМС- порака која им била препратена, наводно, од портпаролот на МВР, Иво Котевски, а во која се вели дека „Заев веројатно ќе има проблеми околу аспирациите за лидер, бидејќи утрината е уапсен“. Во партијата им била препратена и втора СМС-порака, исто така, од портпаролот Котевски, во која стои дека пратеникот на СДСМ, Станковиќ, ќе треба да му заблагодари на Заев што му го отстапил пратеничкиот мандат и имунитетот. „Ова е преседан, вакви пораки да испраќа портпарол на МВР. Ако нешто најмногу ме ’извади од кожа‘ тоа се пораките на портпаролот. Некој се апси, а некој си прави забавен алманах“, коментираше Шекеринска.

Силвана Бонева од ВМРО-ДПМНЕ на продолжението од седницата го искара претседателот на Собранието, Трајко Велјановски, бидејќи и' дозволил на Шекеринска да ја злоупотреби процедуралната интервенција. Најавата на Шекеринска дека ќе го напуштат Собранието, според Бонева, е притисок врз судската власт и истражните органи.

„Законодавниот дом треба да работи независно и да ги остави другите власти во државата да си ја тераат работата како што прилега на демократска држава. Единствена политичка партија која си дозволува да прави притисок врз судската власт и другите власти во Македонија е само СДСМ. Тоа го видовме кога Бучковски беше во суд, а тие го блокираа судот, го видовме и во Комисијата за деловнички и мандатно-имунтетни прашања, а сега и од собраниската говорница,“ им порача Бонева на пратениците во собраниската сала. Таа рече дека Шекеринска искажала тешки квалификации „кои не прилегаат на партија која се нарекува демократска“.

Потегот на СДСМ ќе го следат и другите партии од опозицијата. Собранието ќе го бојкотираат ЛДП, НСДП и Нова алтернатива.

„Ова што се случува денеска е страшно“, изјави Андреј Жерновски од ЛДП, кој смета дека апсењето на Заев е срам за земјава. „Ова не е Македонија што ја познавам. Ова е друга Македонија во која владее режим, во која секој политичар, секој новинар, секој граѓанин што не се согласува со политиката на Груевски ќе биде малтретиран од МВР“, изјави Андреј Жерновски од ЛДП. Тој потенцира дека ВМРО-ДПМНЕ чекале да замине делегацијата од Советот на Европа од земјава за да го уапсат Заев. Според Жерновски, малтретирањето од страна на власта почнало само три дена по изборите кога ЛП била истерани од нивните простории.

Според Горан Мисовски од НСДП, спектакуларното апсење на Заев укажува дека на ВМРО-ДПМНЕ не и' е важно функционирањето на правната држава и заштитата на основните човекови права. „Очигледно е дека Груевски побара мандат од 61 пратеник токму за демонстрација на сила и моќ“, рече тој.

Ѓорѓи Оровчанец од Нова алтернатива смета дека Собранието прераснало во нотаријат на владејачката партија, односно само за одредена политичка елита. „Собранието веќе не е врвна законодавна установа, туку стана само еден сегмент на техничка верификација на желбите на една политичка елита“, истакна Оровчанец, додавајќи дека постои тешка политичка криза во која нема дебата и затоа е ирационално да се поставуваат какви било прашања во однос на македонското општество кога одговорите се однапред познати.