Парното поскапи за 8,5 отсто

Корисниците на топланата „СкопЈе север“ Ќе добиЈат најголемо поскапување од 13,29 проценти

Маја Томиќ



Од денеска поскапува парното за корисниците на „Топлификација“ за 8,42 отсто, а за оние на „Скопје север“ за 13,29 проценти, пресече вчера Регул��торната комисија за енергетика. Оваа одлука, односно новите цени, ќе важат до крајот на годинава, а потоа ќе следи нова пресметка на трошоците на „Топлификација“ и најверојатно и нови цени.

Поскапувањето, како што се наведува од РКЕ, е резултат на зголемувањето на цената на природниот гас за 19,6 проценти во четвртиот квартал од годинава, што предизвикало зголемување на трошоците за производство на топлинската енергија. Топлинските компании побарале уште поголема цена. Според поднесените барања до РКЕ, „Топлификација“ побарала зголемување од околу 13 проценти, а „Скопје север“ за околу 15 проценти.

Скопјани се револтирани бидејќи мрзнат од почетокот на грејната сезона. Најавуваат масовно исклучување од овој вид затоплување за кое плаќаат цела година, а не се стоплени. Згора на се', цената постојано расте и последното покачување е трето оваа година.

„Живеам во стан од 70 квадратни метри и не сум воопшто задоволна од греењето на ’Топлификација‘. Кога ќе станам за на работа смрзнувам и вклучувам греалка, секое утро. Како може парното да се вклучува во 7 часот наутро, а посебно што се млаки радијаторите и воопшто не се стоплува станот во текот на денот. Направив пресметка дека со новото покачување ќе плаќам 50 евра месечно цела година. А, за 600 евра годишно немам намера да се смрзнувам и да се топлам онака како што сака ’Топлификација‘, па решив да го откажам ова греење и да се топлам со директни грејачи вклучени на постојните радијатори. Пресметав дека ми е поисплатливо месечно да плаќам и по 100 евра за струја, но барем ќе се греам јас кога сакам и ќе ми биде топло“, вели Д.М. од Скопје, жителка на Аеродром.

Друга, пак, сограѓанка веќе решила и од минатиот месец е исклучена од ова греење. „Јас го исклучив парното затоа што половина станари од мојата зграда се исклучени од лани и мене автоматски ми пораснаа сметките за парно за 10 до 20 проценти. Но, попусто ги давав парите, затоа што ѕидовите се ладни и не можевме никако да се згрееме. Смрзнавме. Сега се затоплуваме на струја и сме стоплени. Пресметавме и дека ќе имаме пониски трошоци за греење доколку плаќаме само неколку месеци во грејната сезона, а не цела година како досега“, нагласува В.П. од Кисела вода.

Од „Топлификација“ појаснуваат зошто корисниците плаќаат повисоки сметки доколку дел од станарите се исклучат од парно греење.

„Секој граѓанин плаќа одредена месечна сума за парно-греење, во зависност од квадратурата на станот, но сметката му е поголема доколку во зграда од 20 станови, на пример, 10 се исклучени, а 10 се корисници на топлинска енергија. Бидејќи, од една страна мора да се плаќаат редовните трошоци на ’Топлификација‘ за инсталацијата, за разводните уреди и слично, тоа е заеднички трошок што се дели подеднакво на бројот на сите корисници во одреден објект и од тоа ќе зависи и висината на нивните сметки. Не е исто ако станува збор за 10 корисници, при 20 исклучени станови, и обратно“, појаснува Методија Стојчев од топлана „Скопје север“.

Тој додава јасно, доколку се исклучени од греење корисниците од сите соседни станови, автоматски е поладен и станот што користи парно, иако се испорачува еднаква топлинска енергија како и претходно. Така што, доколку сите станари што продолжиле да се греат побараат да им се испорачува поголема температура на топлинска енергија, тоа автоматски ќе значи дека ќе им се наплатуваат и повисоки сметки.

На новите цени на парното вчера реагираше Либерално-демократската партија. Таа поднесе жалба до Комисијата за жалби од областа на енергетиката со која бара да се укине новата одлука и да се сопре трендот на понатамошно поскапување на парното.

„ЛДП најостро реагира на најновата одлука на т.н. независно тело Регулаторната комисија за енергетика за последното покачување на цената на парното греење. Разбирливи се и очекувани реакциите на граѓаните кои оваа есен, покрај ладните радијатори, добија и уште еден ладен туш од ’Топлификација‘“, се вели во соопштението на оваа партија. Според неа, едно семејство кое досега месечно плаќало по 2.000 денари за парно, отсега ќе треба да плаќа по 2.300 денари, а на годишно ниво 27.600, а тоа значи дека од тенкиот семеен буџет ќе треба да се издвојат 3.600 денари повеќе.