Црвенковски не издал државна тајна, вели Шврговски

Јавниот обвинител се откажа од кривичен прогон, но остави можност за прекршочна одговорност на Црвенковски и МИА

Љубиша Станковиќ

Јавниот обвинител Љупчо Шврговски се откажува од прогон на лидерот на СДСМ, Бранко Црвенковски, и на новинската агенција МИА. Обвинителството не нашло ништо што би упатило на можноста Црвенковски и МИА да сториле кривично дело издавање државна тајна.

Клучниот аргумент на Обвинителството за нивно повлекување од натамошната истрага е тоа што на документот кој го презентираше Црвенковски немало печат со назнака „државна тајна“.

Обвинителот Шврговски појаснува дека документот од преговорите за името на себе имал ознака „строго доверливо“, а не класификацијата „државна тајна“.

И покрај откажувањето од кривичниот прогон Шврговски не исклучува друг вид на одговорност. „Овде, апсолутно, нема работа за Јавното обвинителство, но Дирекцијата за класифицирани информации може прекршочно да постапува“, изјави тој. Дали со ваквата изјава обвинителот Шврговски најавува нов развој на целиот случај засега е тешко да се претпостави.

Скопскиот јавен обвинител Марко Зврлески ни изјави дека до нив не биле испратени седумте страници од документите, кои, само еден ден по настапот на Црвенковски на дебатна емисија на телевизија Канал 5, беа објавени од новинската агенција МИА.

„Ние нема што повеќе да коментираме. Тоа што го изјави јавниот обвинител на Македонија е став кој ние само ќе го почитуваме“, вели Марко Зврлевски, чие обвинителство беше задолжено за проверка на наводите околу евентуалната кривична одговорност на Црвенковски и на агенција МИА.

Случајот со објавувањето на документот, кој датира од 2005 година и се однесува на понудени предлози околу промената на името, стана предмет на обработка истиот момент кога Црвенковски беше јавно обвинет дека објавил државна тајна. Јавниот обвинител Љупчо Шврговски минатата среда изјави дека Обвинителството ќе изврши проверка на обвинувањата. Тој најави и хипотетичка можност за кривична одговорност доколку се покаже дека документот е оригинален и дека со него била изнесена државна тајна. Но, Шврговски и во таа пригода остави можност за утврдување на автентичноста на документот и проверка на неговата класификација.

За објавениот документ со свое мислење излезе и претседателот на државата, Ѓорге Иванов. Тој смета дека лидерот на опозицијата треба да си ги понесе последиците, поради тоа што открил документ кој бил класифициран како државна тајна.