08.06.2012, 14:39 Делата на СДСМ се транзицијата и криминалната приватизација
Делата на СДСМ се транзицијата и криминалната приватизација. Тие не дебатираат, тие навредуваат, провоцираат, арогантно се однесуваат. Тоа е така затоа што немаат аргументи, рече на денешната прес - конференција портпаролот на ВМРО - ДПМНЕ, Александар Бичиклиски.
Тој нагласи дека не само што една недела одбегнуваат да одговорат каде тие ги трошеа парите додека беа на власт и зошто ништо не се градеше, немаше проекти и мерки, СДСМ одбегнува дури и да ја понесе одговорноста за криминалната приватизација.
Бичиклиски денеска потсети и на некогашниот гигант „Центро“, кој беше меѓу првите која престана да работи во времето на Бранко Црвенковски.
- На улица, брутално беа избркани околу 1.200 граѓани. Тоа се 1.200 семејства кои преку ноќ беа отпуштени, а објектите на оваа фирма ги разграбаа моќниците блиски на СДСМ. Додека тие се богатеа, 1.200 семејства едвај крај со крај врзуваа. Тоа се упропастени човечки животи, рече портпаролот на ВМРО - ДПМНЕ.
Слична судбина, посочи Бичиклиски, ги снајде и вработените од Славија, Рудници и Железарници Скопје, Треска Мебел, Фас 11 Октомври, Алумина, Стаклара, Газела, Црвена Звезда Скопје, Хемтекс, МЗТ, Комуна, Циглана, Типо, Стаклара…Се затворија и многу други фабрики низ цела Македонија, подвлече, се затвори Чик Куманово, Порцеланка Велес, Рудник Злетово, Бентомак-Крива Паланка, Силика Гостивар, Анска Река Валандово, Предилница Битола, Жито Битола, Злетово Батерии, Киро Фетах, Микрон Прилеп, Илинденка, Тајмиште Кичево, Македонка Штип, Руен Кочани, Винојуг Гевгелија, Отекс Охрид, Етко Тетово и многу други.
- Овие затворени фабрики и илјадници отпуштени работници е она што го правеше СДСМ и Бранко Црвенковски кога беа на власт. Тоа се нивните единствени дела. Македонија памети, рече на денешната прес - конференција Александар Бичиклиски.
|
