07.06.2012, 15:11 (ОБНОВЕНО) Сега Кипар ќе не турка во ЕУ
Македонската делегација ја протна и хашката пресуда во заклучоците на Мешовитиот комитет Македонија-ЕУ
Датум за преговори на Македонија со ЕУ до крајот на годината, т.е. за време на кипарското претседателство, враќање на придавката „македонски“ и почитување на македонскиот идентитет, култура и јазик - се барањата на Мешовитиот комитет на македонскиот и европскиот парламент, од состанокот што го одржаа денеска во Брисел.
Расправата што ја водеше претседавачот, германскииот европратеник Јоргос Шацимаркакис, на моменти била бурна, но немало резерва околу ставот дека треба да се забрза евроинтегративниот процес на Македонија, за да се спречи можниот евроскептицизам поради тоа што три години по ред земјата добива препораки за преговори, но не и датум.
Во однос на спорот за името помина и амандманот на Антонио Милошоски, со кој се поздравува пресудата на Меѓународниот суд за правдата од Хаг во однос на Времената спогодба, со оценка дека таа претставува обврска за Грција да не го попречува членството во НАТО и почетокот на преговорите во ЕУ.
Шацимаркакис, запрашан дали ќе има ефект од оваа препорака, одговорил дека за првпат европарламентарците се толку конкретни и со утврден рок, за време на идното претседателство, кое започнува наскоро. „Сега треба да се сочека и да се види што кипарската влада и претседателство ќе направи со оваа препорака“, изјавил тој.Јасната препорака за преговори според него е поради напорите кои ги прави земјата, чија влада и општество се толку многу посветени на европските интеграции и имаат големо очекување од истите, што ќе биде фрустирачки да не се видат резултати.„Ова е јасен сигнал до Советот да се започне со преговорите“, порача тој.
„Да ви кажам одговорно, ако некоја земја сака прашањето за името да биде решено - тоа е Грција! Решението на проблемот ќе придонесе за деблокирање на многу регионални стратегии од големо значење за Грција. Грција е прва која сака да се најде решение за овој проблем и како доказ го приложувам ставот на нашата земја. Нашиот Мешовит парламентарен комитет треба да дискутира за европерспективите на вашата земја, но ние не можеме да го решаваме проблемот со името. Ниту една земја-членка на ЕУ не сака Македонија да остане надвор од ЕУ. Принципот на добрососедски односи е клучен за европското семејство“ - бил ставот на грчкиот европратеник Јоргос Кумуцакос.
На состанокот присуствуваше и Директорката на директоратот за проширување при Европската комисија, Александра Кас-Грање, која порача дека е потребно да продолжи исполнувањето на политичките критериуми за отворање на пристапните преговори. „Европската комисија ја повикува Македонија да продолжи со реформите, а тоа го овозможува и високиот дијалог за реформи во клучните области, како слобода на медиумите, владеење на правото и слично“, изјави Кас-Грање.Според неа, еврокомесарот за проширување Штефан Филе е посветен на Македонија и дека стои зад високиот пристапен дијалог, кон што е посветен и македонскиот премиер Никола Груевски. (Н.Р.)
|
