07.06.2012, 22:00 Дански компании заинтересирани за бизнис во Македонија
Премиерот Груевски денеска престојува во Данска, каде се презентираат можностите за инвестирање
Тоа е прва посета на македонски премиер на Данска. За време на посетата претседателот на Владата се сретна со данската премиерка Хелен Шмит и со претседателот на Парламентот Могенс Ликетофт, а имаше средби и со раководството на Стопанската комора на Данска и со најголемата данска енергетска компанија. Вечерва пред околу 60-тина дански компании ќе ги претстави можностите за правење бизнис во Македонија и услови коишто ги нуди државава.
- Во Данска главно сме дојдени за бизнис презентација, меѓутоа правиме и политички средби. Пред малку се сретнав со премиерката на Данска, а исто така се сретнав и со претседателот на Парламентот. Утрово имав средба со раководството на Стопанската комора и престојував во практично најголемата данска енергетска компанија. Се запознавме со нејзиното работење, но и тие се запознаа со можностите за инвестирање во енергетиката во Македонија, изјави Груевски по средбата со премиерката Шмит.
Со премиерот на Данска, нагласи, разговарале за македонските аспирации за вклучување во НАТО и ЕУ, но и за проблемите со кои се соочуваме со соседот Грција, која го блокира нашето членство со една уцена да се смени нашето име и тие да ни одредат ново име на нашата држава, на нашиот јазик и на нашата националност.
- Разговаравме за сите детали поврзани со минатото за проблемот со името и за потребата од поголема ангажираност на меѓународната заедница во решавањето на ова прашање, бидејќи Грција не чувствува никаков притисок и ако вака продлжат бесконечно ќе го пролонгираат решавањето на проблемот. Потребен е поголем ангажман од страна на меѓународната заедница зашто се работи за непринципиелно делување од страна на една нивна земја членка и за кршење на меѓународното право и барање солидарност од другите за нешто што не е принципиелно и што не е во духот на вредностите коишто ги делат земјите членки на НАТО и земјите членки на ЕУ, истакна премиерот Груевски.
На политичките разговори, рече, информирале за подобрите можности за правење бизнис во Република Македонија како потенцијална бизнис дестинација. Тоа уште повеќе го нагласивме на средбата со раководстовто на Стопанската комора.
- Околу 60 дански компании имаат пројавено интерес и сакаат да чујат повеќе за Македонија. Ние сме тука на бизнис форумот за да им ги објасниме сите можности за правење бизниси, да ги поканиме да дојдат во Македонија да ги разгледаат одблиску можностите за правење бизнис, да се сретнат со други компании домашни и странски и некои од нив да донеса�� одлука за инвестирање во Македонија, нагласи премиерот Груевски пред почетокот на бизнис форумот.
|
