Се проблематизира прославата на албанското знаме

Опозицијата не се согласува државата да го финансира јубилејот на симболот на независноста на Албанија

Стогодишнината од албанското знаме да се тргне од програмата за одбележување годишнини на значајни настани и личности, бараат пратениците од СДСМ. Тие, на денешната седница на собраниската Комисија за култура, ќе се обидат со амандман да интервенираат во првичниот список на значајни настани и личности, што е договорен пред околу еден месец.

Опозиционерите сметаат дека нема потреба да се одделуваат пари од државниот буџет за прослава на едновековниот јубилеј од албанското знаме, особено ако се има предвид дека државата, пред неколку месеци, не ја одбележа 70-годишнината од исполнувањето на македонската химна.

Вториот аргумент на опозицијата е дека не треба да се долева масло на меѓуетничките несогласувања.

Функционери на ДУИ од поодамна најавија дека од буџетот ќе се одвојат средства за повеќе манифестации во Македонија, по повод 100-годишнината од независноста на Албанија и албанското знаме. Иако од Владата го негираат тоа, едновековниот јубилеј на албанското знаме се најде во програмата за одбележување значајни настани и личности, што ја носи Собранието.

СДСМ предлага од програмата, за која парламентот ќе расправа оваа седмица, да се избрише и 100-годишнината од именувањето на Мехмет Паш Дерала за прв министер за одбрана на Албанија. Наспроти аргументацијата на ДУИ дека Дерала потекнува од Македонија, поточно од селото Градец, опозицијата посочува дека, сепак, станува збор за министер на друга држава.

Пратеничките групи доставија повеќе амандмани за дополнување и промена на првичниот предлог за одбележување важни годишнини. По критиките дека во програмата за оваа година се фаворизираат настани и личности од историјата на Албанците, на сметка на значајни датуми за македонската култура, пратениците ќе се обидат со амандмани да ги покријат пропустите.

И СДСМ и ВМРО-ДПМНЕ предлагаат да се одбележат шестдеценииските јубилеи од објавувањето на првиот роман на македонски јазик „Село зад седумте јасени“ на Славко Јаневски и од првиот македонски филм „Фросина“, во режија на Воислав Нановиќ, а по сценарио на Владо Малески. Пратеници на ВМРО-ДПМНЕ, пред околу еден месец, гласаа воздржано за предлогот на колегите од опозицијата - јубилеите од овие два значајни настани за македонската култура да се додадат во програмата. Но, овој пат, се предомислија, така што постои можност програмата да се надополни со годишнините на првите роман и филм на македонски јазик. (А.М.М.)