Кумановска порака од Црвенковски до Бучковски

Според лидерот на СДСМ, нелогично е некој да се занимава со демократизација на опозицијата во моменти кога таа влегува во решавачка битка

Александра М. Митевска



Повеќе пораки до Владата, но и до квазиопозицинерите, како што ги нарече, упати лидерот на СДСМ, Бранко Црвенковски, од бината на плоштадот во Куманово, каде што партијата го одржа четвртиот митинг од проектот „Работно лето“. Црвенковски не го спомна со име Владо Бучковски, неговиот некогашен близок соработник и поранешен премиер и лидер на СДСМ, ама тој јасно може да се препознае во дел од говорот на опозицискиот водач.

„Она што на многумина не им е јасно е кои се мотивите на некои квазиопозиционери, кои токму во овој период кога државата пука по сите рабови и кога влегуваме во решавачка битка, сметаат дека главно прашање е како да се реформира СДСМ“, рече Црвенковски. Потоа, тој понуди три опции: „Секој што сака да ни се придружи е добредојден, ама без пазари и уцени. Ако овој и ваков СДСМ не ви се допаѓа, формирајте партија. А ако не ви се прифатливи овие опции, тогаш имате сериозен проблем да објасните за кој, всушност, работите“, рече Црвенковски, кој претходно порача дека СДСМ никогаш повеќе нема да се оддалечи од народот и да демонстрира ароганција, туку дека ќе биде народна партија.

Бучковски, кој подолго време зборува за непосредни внатрепартиски избори, вели дека се препознал во обраќањето на Црвенковски. Како одговор, тој нагласува дека никогаш нема да биде со ВМРО-ДПМНЕ, туку дека ќе се бори, како што вели, за демократизација на СДСМ во рамките на партијата. „Неколкумина сме кои гласно говориме за политиките на раководството на СДСМ, иако повеќемина не се согласуваат со нив“, вели Бучковски.

Од СДСМ велат дека пораката на Црвенковски не била упатена на лична адреса, туку дека е општа, како што наведуваат, за сите оние што се обидуваат во изминатиов период да ги збунат граѓаните, без разлика дали нивниот мотив е пазар со СДСМ или затоа што се уценети и под притисок на власт. „Не може никој да биде ем опозиција ем близок со власта. Сега е вистинскиот период за чиста ситуација, во која точно ќе се знае кој и' мисли добро на Македонија, а кој се обидува да седи на два стола.

Во услови кога власта ги злоупотребува сите механизми за да се пресмета со опозицијата, не постои оправдување за самопрогласената улога на ’опозиција на опозицијата’“, велат од СДСМ.

Социјалдемократите викендов во Куманово ја промовираа кандидатурата за трет мандат на актуелниот градоначалник, Зоран Дамјановски, кој важи за близок пријател на Бучковски. Дамјановски првпат беше кандидиран, а потоа и избран за градоначалник во 2005 година, кога на чело на СДСМ беше Бучковски, кој тогаш токму од Куманово ја почна кампањата за локалните избори. Поранешниот сдсмовски лидер и сега смета дека Дамјановски е добро решение и вели дека му посакува да победи по трет пат. „Црвенковски не може да ме скара со Дамјановски. Меѓу нас има долгогодишно пријателство и цврсти врски. Но, не се проблем кандидатите на СДСМ за градоначалници, туку начинот на кој се промовираат политиките на партијата. Плурализмот во ставовите е она што го разликуваше СДСМ од ВМРО-ДПМНЕ“, вели Бучковски.

Во изминатите седум години, СДСМ помина низ повеќе турбуленции и смени на кормилото, кои се одразија и на релациите внатре во партијата. Несогласувањата меѓу Црвенковски и Бучковски почнаа да излегуваат на површина во 2006 година, кога СДСМ ја изгуби власта, за во периодот потоа нивната комуникација да доживе неколку осцилации топло-ладно. Во меѓувреме, Бучковски ги изгуби сите позиции во партиските тела, а во очекување на новите локални избори недоразбирањата меѓу некогашните соработници повторно се засилуваат.