Инјекции за смирување, уцени и тајни агенти

Ексклузивни извадоци од првата автобиографска книга на Љупчо Георгиевски. Георгиевски вели дека за сегашниот премиер Груевски бил врвен министер за финансии но дека бил скаран со сите министри во тогашната влада. Македонија ќе беше подобра ако наместо Глигоров му дадеше шанса на Петар Гошев, тврди во својата книга поранешниот премиер и лидер на ВМРО-ДПМНЕ

Издавачката куќа Лекс Легис наскоро ќе ја даде во продажба првата автобиографска книга на поранешниот премиер и лидер на ВМРО-ДПМНЕ Љупчо Георгиевски, во која тој низ прашања одговара за најважните политички и животни моменти од неговата кариера. Авторот, чие име нема да стои на книгата, вчера ни' потврди дека книгата е авториризирана од Георгиевски кој раскажува досега за јавноста непознати детали врзани за неговата личност и за некои моменти од поблиската политичка историја на Македонија.

Во книгата Георгиевски открива дека запалил свој роман пред 5-6 години бидејќи, вели, бил напишан на антихристијанска основа. Вели и дека Владимир Голубовски сакал да му направи пуч и дека тоа било причината за неговото отстранување од ВМРО-ДПМНЕ во раните '90-ти години. Открива и дека името ВМРО-ДПМНЕ дошло откако Драган Богдановски го дал името ДПМНЕ, а Георгиевски и Борис Змејковски подоцна го ставиле префиксот ВМРО. Околу долгата коса која беше неговиот имиџ во тој период вели дека бил инспириран од Роберт де Ниро во филмот „Мисија“ и од сликарот Алберт Дирер.

Георгиевски вели дека „бил шокиран“ кога на првите повеќепартиски избори во 1990 година ВМРО-ДПМНЕ освоиле 39 пратеници. Открива дека со Доста Димовска првпат се сретнале преку издавачката куќа „Алфа“ која му печатела роман за кој одлучувала комисија чиј член била и таа.

Одговарајќи на прашањето за политиката на почетокот на '90-тите години, тој вели дека Македонија денес ќе беше подобро место за живеење, ако наместо Глигоров му се дадеше шанса на Петар Гошев кој му се допаднал затоа што бил „првиот комунистички лидер што прави отпор кон Југославија“.

Георгиевски тврди и дека Глигоров во тој период го кршел Уставот бидејќи два и пол месеци не го давал мандатот за премиер кој му следувал на ВМРО-ДПМНЕ која на изборите во 1990 освоила најмногу пратенички места, и дека го одбил предлогот Александар Лепавцов да биде премиер од редовите на ВМРО-ДПМНЕ. „До атентатот Глигоров беше и претседател и премиер, што беше спротивно на Уставот“, вели Георгиевски. За првиот премиер Никола Кљусев, вели дека бил „играч на Глигоров“.

Георгиевски вели дека Албанците во тој период била подготвени да земат учество во владата и со двајца министри од нивните редови. „Одбивме, и тоа е мојата најголема политичка глупост што сум ја направил досега“, вели тој.

За Борис Змејковски вели дека се богател додека бил генерален секретар на ВМРО-ДПМНЕ и дека тој како претседател на партијата немал увид каде одат партиските пари со кои располагал Змејковски. Открива и дека потсмевот и иронијата што ги упатувала СДСМ кон необразованоста на Змејковски, го олеснило неговото отстранување од функцијата генерален секретар.

Георгиевски тврди дека и покрај сите гафови на политиката на СДСМ од 1994-1998 година, гласачите се' уште му биле наклонети на Црвенковски и дека доколку не направела ВМРО-ДПМНЕ коалиција со Васил Тупурковски, СДСМ можела пак да ги добие изборите. Во оцената за Црвенковски во тие мигови, Георгиевски го опишува како „способен оратор“.

Во врска со конфликтот 2001 година кога Георгиевски беше премиер вели дека тогашниот министер за внатрешни работи Љубе Бошкоски бил манипулиран, но не кажува од кого, а за себе вели дека бил лажен од Доста Димовска. За време на конфликтот во 2001 година Георгиевски вели дека бил толку напнат што по масакрот крај Вејце морале да му дадат инјекција за смирување.

Георгиевски се жали и дека неговите блиски соработници генерално во периодот од 1990 - до 2003 кога го напушти кормилото на ВМРО-ДПМНЕ, биле во врска со тајните служби.

За назначувањето на Филип Петровски за конзул во Њујорк вели дека се случило затоа што тој почнал да му прави „ситни уцени“. Открива и дека по заминувањето на шесте пратеници со Борис Стојменов останатите пратеници почнале да го уценуваат а четворица му побарале по 100 илјади германски марки (50 илјади евра, н.з.) за да останат со Георгиевски. Не кажува дали им биле дадени парите.

Открива и дека во 1999 година бил повикан во Белата Куќа каде Медлин Олбрајт побарала Македонија да дозволи напад на копнените сили на НАТО врз режимот на Милошевиќ од нејзина територија, на што тој дал согласност, но потсетува дека до тоа сценарио никогаш не дошло. Вели и дека во тие критични моменти Арбен Џафери „не се сложувал“ со присуството на косовските бегалци во Македонија и дека заедно извршиле притисок врз Хашим Тачи тие да се вратат на Косово.

Вели и дека при една посета на Љубе Бошкоски на Хаг се сретнал со Слободан Милошевиќ со кого разговарале петнаесет минути откако овој дознал од Љубе дека Љупчо доаѓа и сакал да се види со него. Открива и дека со Зоран Џинџиќ разговарале за размена на територии меѓу Македонија, Албанија и Косово.

За Борис Трајковски вели дека „немал капацитет“ да биде претседател, а неговата победа на претседателските избори во 1999 година ја нарекува „пирова победа“ на ВМРО-ДПМНЕ. „Глигоров и Црвенковски имаа капацитети за шеф на државата додека Трајковски и Ѓорге Иванов немаат“, вели Георгиевски.

За Груевски вели дека бил врвен министер за финансии но дека бил скаран со сите други министри во владата. „Јас тоа тогаш не го знаев“, вели Георгиевски. Тврди дека Ганка Цветанова и Љубе Бошкоски сакале да бидат лидери на ВМРО-ДПМНЕ по објавата за неговото повлекување во 2003 година. Вели и дека за време на неговиот судир со Груевски по неговото доаѓање за лидер а Георгиевски почесен лидер, Трајко Вељаноски постојано доаѓал во кабинетот на Георгиевски. „Се сомневам дека тој тогаш му бил шпион на Груевски и затоа е денес награден со толку висока функција“, вели Георгиевски.

Тој открива и дека Борис Трајковски барал од него да лобира кај Груевски уште еднаш да го кандидираат за претседател за втор мандат но дека "Груевски не сакал ни да чуе" за такво нешто.

За некогашниот коалициски партнер Васил Тупурковски вели дека е "ОК како човек но дека е скаран со работата". За себе, пак, открива дека сега живее во стан на Водно и дека први соседи му со Борис Стојменов и Зоран Ставрески.

Давајќи политички оцени за сегашните случувања Георгиевски низ разговорот со авторот на книгата вели дека „Македонците се најголеми фалсификатори на балканската историја“ и дека „ќе си го проколнат мајчиното млеко што се откажаа од Свети Климент и Свети Наум“. (С.К.)