Актерка го тужи режисерот на „Невиноста на Мухамед“

Синди Ли Гарсија го обвини Накула Баселеј Накула дека ја измамил да настапи во филм „полн со омраза“

Американска актерка која се појавува на аматерската антиисламска видео снимка што предизвика протести низ муслиманскиот свет го тужи осомничениот режисер на филмот. Синди Ли Гарсија го обвини Накула Баселеј Накула дека ја измамил да настапи во филм „полн со омраза“ за кој била натерана да верува дека е филм за пустинска авантура. Таа, исто така, бара судска наредба за „Јутјуб“ да го повлече филмот.

Видеоснимката синхронизирана на арапски јазик предизвика општ гнев поради исмејувачкото портретирање на пророкот Мухамед.

Филмот „Невиноста на муслиманите“, снимен во САД, предизвика протести на Блискиот Исток, Северна Африка и дури до Шри Ланка, при што некои демонстрации се претворија во деструктивни и насилнички безредија. Четворица Американци, меѓу кои и амбасадорот Крис Стивенс, беа убиени во напад врз американскиот конзулат во Бенгази, Либија.

Според Гарсија, во сценариото што го добила не се споменувал пророкот Мухамед, ниту, пак, се споменувала религијата. Таа тврди дека добила смртни закани откако видеоснимката беше објавена на „Јутјуб“ и вели дека нејзината поврзаност со филмот го нарушила нејзиниот углед.

Во судското жалба, поднесена до Вишиот суд на Лос Анџелес, Гарсија наведува измама, клевета и намерно нанесување емотивна болка.

Адвокатите на Гарсија тврдат дека промените во дијалогот постпродукцијата ја претставиле во лажна светлина. „Гарсија имаше легално заштитен интерес на нејзината приватност и правото да не изговара зборови на омраза или да биде прикажана како човек полн со предрасуди“, се наведува во тужбата. „За време на снимањето или на сцената не се споменуваше ’Мухамед’. Не се упатуваше на религијата, ниту, пак, имаше какви било сексуални содржини за кои знаела Гарсија“, се додава во тужбата.

Накула негира дека е „Сем Басиле“, псевдоним што го користи личноста која ја објави видеоснимката онлајн. Тој се крие откако изјави за американските медиуми дека бил менаџер на компанијата која ја помогна продукцијата на филмот, но американските претставници сметаат дека тој е режисерот.

Накула беше обвинет за измама во 2010 година и требаше да плати надомест од над 790.000 долари. Тој беше ослободен во јуни 2011 година со одредба да не пристапува на интернет или да користи псевдоними без дозвола. Властите го сослушуваа минатата недела дали прекршил кој било од тие услови.

Досега „Јутјуб“ ги одбиваше барањата на Гарсија да се повлече филмот, се дознава од тужбата, иако го блокираше прикажувањето во Саудиска Арабија, Либија и Египет. „Тужбата не е кршење на првиот амандман ниту правото на Американците да кажат што мислат, но бара навредувачките содржини да се повлечат од интернет“, се нагласува во жалбата.

„Гугл“, кој ја поседува „Ју тјуб“, го блокираше филмот во Саудиска Арабија, Либија и Египет. Портпарол на „Јутјуб“ соопшти дека ја разгледува тужбата и ќе се појави на суд. (Би-Би-Си)

Револтот се сврте и против „Мекдоналдс“

Џакарта - Гневни поради филмот „Невиноста на муслиманите“ во кој се навредува пророкот Мухамед, Индонезијците денеска ги продолжија протестите во третиот по големина град во земјата Макасар.

Американските конзулати во градоовите Макасар и Медан се веќе затворени.

Демонстрантите палеа автомобилски гуми и го принудија ресторанот за брза храна „Мекдоналдс“ да прекине со работа. Подоцна влезот на ресторанот е прекриен со транспарент: „Ова мора да биде затворено како симбол на нашиот протест поради филмот ’Невиноста на муслиманите‘“, создаден во САД“.

Конзулатот на САД во главниот град на провинцијата Суматра, исто така, е затворен.

Американската амбасада во Индонезија издаде соопштение за своите граѓани дека дипломатско конзуларната мисија во Индонезија ќе биде затворена во текот на утрешниот ден, за кога се очекуваат поголеми протести. (МИА)