Жесток и импресивен старт на МОТ

„Пред вашите очи“ беше вистински погодок за отворањето на фестивалот на кој утревечер во Драмски ќе биде одиграна и претставата „Змејовата невеста“ во режија на Нела Витошевиќ

Театарската претстава „Пред вашите очи“ со која во петок во Младинскиот културен центар беше отворен 37. „Млад отворен театар“ беше вистински погодок за старт на годинешното издание на реномираниот фестивал. Салата очекувано беше полна, а публиката со големо внимание ја следеше актерската игра на децата од 8 до 14 години во импресивната, несекојдневна британско-германска претстава за возрасни, која отвораше низа животни прашања поврзани со суштината и смислата на животот, со процесот на стареење, со станувањето возрасен, и што тоа воопшто и вреди и значи. Седумте млади автори покажаа исклучителна моќ за трансформација во улоги од различни возрасти, играа очи во очи со публиката, затворени пред неа во „сигурна соба“ направена од еднонасочни огледала, а оваа крајно динамична и полна претстава на продукциите „Гоб сквод“ и „КАМПО“ со добар избор на музика и костими, беше испратена со воодушевување и голем аплауз. Трупата „Гоб сквод“ е составена од британски и германски уметници и се смета за една од најиновативните современи изведувачки трупи во Европа. Седумтемина уметници заедно работата врз концептот, режијата и изведбата на нивните дела. Основана во 1994 година, со бази во Берлин и Нотингам, оваа трупа ја истражува точката во која театарот се среќава со изведбата, уметноста и медиумите. Нивните дела добиваат широко меѓународно признание и редовно се играат низ Европа, а досега гостувале и во Австралија, Африка, Азија, Северна и Јужна Америка. Покрај театрите и галериите, трупата користи и урбани простори за претставување на своите дела – куќи, продавници, подземни железници, паркинзи, хотели, па и голи улици.

„Нешто е гнило“ е мотото на годинешното издание на МОТ, на чиј старт се обратија директорот на МКЦ, Златко Стефковски и Љубиша Никодиновски- Биш, еден од основачите на фестивалот и негов долгогодишен уметнички директор. Беше отворена и изложбата на плакати од 13. Меѓународно биенале на театарски плакат „Rzeszow 2011“, што се одржува во истоимениот град во Полска, а во МКЦ ќе биде поставена до 26 септември. Член на жирито на ова, последно издание на Биеналето бил и македонскиот графички дизајнер Лазе Трипков, а првата награда му била доделена на Вања Цуцулиќ од Хрватска. Вечерва на програмата е претставата на прилепскиот Центар за култура „Марко Цепенков“, „Змејовата невеста“ во режија на Нела Витошевиќ, базирана на драмскиот текст на Димитар Г. Молеров, чие одржување е закажано за утревечер во 20 часот, во Драмскиот театар.

Утре во 11,30 часот пак, во Младинскиот културен центар ќе биде одржана видеопромоција на успешни проекти од програмата „Култура 2007-2013“ на Европската унија, а во 12 часот ќе одржи предавање Андреј Жолдак, режисерот на вечерашната претстава „Војцек“. За утре попладне во 18 часот, на тема „МОТ: Зошто, кога, кој, како - Ние одиме понатаму“ е закажана средба со Љубиша Никодиновски-Биш, а на полноќ во рамки на Кинотеатарот во МКЦ ќе почне да се прикажува вториот дел од трилогијата „Пекол – Чистилиште – Рај“, чиј режисер, сценограф, а и автор на светло и костими е Ромео Кастелучи. (К.Б.)