„Границата“ и „Војцек“ викендов на МОТ

Во рамките на фестивалот „Млад отворен театар“ викендов ќе можат да погледнат претстави со сосема различен сензибилитет

Викендов во рамките на фестивалот „Млад отворен театар“, љубителите на театарот и филмот ќе можат да погледнат претстави со сосема различен сензибилитет. Вечерва во Младинскиот културен центар во 20 часот ќе биде репризирана претставата од отворањето „Пред ваши очи“, а од 22 часот е норвешката „Границата“ по текст, режија, кореографија, сценографија и костими на Јо Стромгрен. Во претставата играат двајца актери, односно маж и жена кои делат работни простории. Доблесно, си нудат заемно почитување, но под површината се крие војна, бидејќи вклучува откривање на емоционални зависности: еден кон друг, кон играта како таква, или кон злобната мешавина на двете како што обично се случува меѓу двата пола. Но, темата е суштински универзална. Граничните конфликти постојат насекаде.

Инаку, продукцијата е резултат на соработката меѓу „Јо Стромгрен компани“ и еден од најсеверните институционални театри на светот „Халогаланд театер“ во Тромсо, Норвешка.

Во рамките на придружната програма на МОТ, пак, насловена „Кино/ театар“, на полноќ во МКЦ ќе биде прикажан швајцарскиот филм „Уште еден куршум“ во режија на Маркус Фишер, музичка балада, мелодрама танцувана со задршка во анонимен град ноќе или две места за средби: џез-бар и стар хотел, или страстна средба меѓу музичар и проститутка... По него ќе биде прикажан белгискиот танцувачки филм „Розас Данст Розас“.

В недела МОТ се сели во Универзална сала, каде што во 20 часот ќе биде изведена украинската „Војцек“ на Андреј Жолдак. И оваа, како и останатите претстави на Жолдак претставува жесток, премногу жесток свет, кој ја испитува човечката издржливост (телото, мозокот, жилите и тетивите, неговите чувства и неговата душа). Може ли да се остане човек во нечовечни услови - тоа е главна тема на овој талентиран, но крајно неурамнотежен режисер, поразувајќи го гледачот со сценските решенија, а потоа фрлајќи го во мачен театарски ракопис. Инаку, социјалната драма „Војцек“, зачувана во фрагменти како последно дело на Бихнер, до ден денес е актуелна, а нејзиното значење за театарот се огледува во безбројните постановки. Фигурата на Војцек, кој од љубов кон својата девојка и вонбрачното дете станува играчка на авторитетите, а на крајот дури и убиец, постојано буди голема фасцинација кај режисерите, уметниците и театарџиите од целиот свет.

На придружната програм�� в недела во МКЦ на полноќ, ќе биде прикажана „Пекол, чистилиште, рај“ во режија на Ромео Кастелучи, која ќе биде изведена и в понеделник и во вторник на истото место во исто време. Претставувајќи ја низ три засебни настани - Пекол, Чистилиште и Рај, Ромео Кастелучи го расклопува, експонира и го трансформира епското дело на Данте во вистински преживеано искуство. (Т.И.)