Македонските музичари освоија „Еми“

„Македонскиот филмски оркестар“ кој ја изведе и сними музиката на Хавиер Наварете за филмот „Хемингвеј и Гилхорн“ ја заслужи наградата „Еми“ за најдобра музика за драма

Музиката на композиторот Хавиер Наварете за филмот „Хемингвеј и Гилхорн“, која целосно беше изведена и снимана од македонските музичари на „Македонски филмски оркестар“ во студиото М2 во МРТВ, ја освои наградата „Еми“ за најдобра музика за филм во категоријата драма.

Доделувањето на наградите „Еми“ беше одржано синоќа, на 23. септември, во Лос Анџелес и претставува најзначајна светска награда од областа на играната телевизиска продукција.

- Доделувањето на наградите „Еми“ е на 23. септември, а музиката на Хавиер Наварете за филмот „Хемингвеј и Гелхорн“ е номинирана за најдобра музика, која ние ја снимавме. Наградата секако би била за композиторот, но и ние, како музичари многу ќе добиеме. Веќе и други композитори ни велат: „Штом сте добри за Наварет, сигурно сте одлични“ - изјави неодамна шефот на Македонскиот филмски оркестар, Олег Кондратенко за интервју во „Утрински весник“

Филмот „Хемингвеј и Гилхорн“ со Клајв Овен и Никол Кидман во главните улоги, во режија на Филип Кауфман ја обработува приказната за бурниот трети брак на нобеловецот за книженост Ернест Хемингвеј и славната американска воена репортерка Марта Кауфман.

Марта е една од неговите четири сопруги, единствената која побарала развод од него и која го инспирирала да ја напише „За кого бијат камбаните“. Во филмот се појавуваат и Моли Паркер, Дејвид Страјтхарн и Роберт Дувал. Драмата премиерно беше прикажана на 28 мај на програмата на ХБО.

Дејството започнува во 1936 година кога двојката за првпат се сретнува барот „Ки Вест“. Тој е познат писател, а таа воен репортер. Тие, повторно налетуваат еден на друг во Шпанија, каде што ја „покриваат“ шпанската граѓанска војна. Престојуваат во истиот хотел на истиот спрат, а за време на бомбашки напад се наоѓаат заглавени во истата соба. Исплашени за своите животи, страста ги надвладува... Стануваат љубовници, а во Шпанија остануваат до 1939 год. Во 1940 година Хемингвеј се разведува од втората сопруга за да може да се ожени со Марта. Во 1945 година таа побара развод од Хемингвеј...(Ј.П.)