Надал: Ќе се вратам кога целосно ќе закрепнам

По шпекулациите со различно ниво на оптимизам, Шпанецот јавно прозбори за својата здравствена состојба

Најголемото прашање во светскиот тенис се промени. Не е веќе кога и дали Енди Мареј ќе освои грен слем титула, туку кога и дали Надал ќе се врати на терените. По неколкуте информативни испади со различно ниво на оптимизам, Надал конечно се отвори пред јавноста, покажувајќи ја вистинската состојба на неговите здравје, ум и срце. Последната обнова на тема неговата рехабилитација велеше дека Шпанецот ќе отсуствува сигурно до ноември. Сега тој е помалку одреден во временски поглед, велејќи дека не му е важно кога ќе се рехабилитира, туку да заздрави целосно.

„Правам се' што ме советуваат лекарите и засега оди добро. Не ми е важно колку бргу ќе закрепнам, туку да закрепнам како што треба“, изјави 26-годишниот тенисер. „Секако, подобро е да биде што поскоро, меѓутоа важното е да си наполно сигурен во себе кога ќе се вратиш. Ќе почнам да играм кога нема повеќе да чувствувам болка во коленото, без разлика колку време ќе треба за тоа. Моментно не сакам да размислувам за иднината, во глава ми е само тоа да работам за комплетно заздравување“, продолжи Надал, одбегнувајќи да прецизира временска одредница. Меѓутоа, таквиот став го крева прашањето за неговата кариера воопшто затоа Шпанецот, сепак, изусти дека неговата желба е да ја почне 2013 во топ-форма.

„Се надевам дека ќе ме видите во Австралија. Тоа ми е главна цел, да се вратам пред Австралијан опен, во Катар, но не можам да кажам со сигурност дека ќе се случи“, призна Надал кој, според тоналитетот на неговите зборови, најверојатно, ќе го пропушти АТП-финалето во ноември, како и завршницата во Дејвис купот меѓу Шпанија и Чешка.

Неговата рехабилитација трае веќе речиси три месеци и се состои од строго утврден режим на активности, третмани и лекарски прегледи. Секое утро тој прави вежби за одржување и зацврстување на мускулната маса, плива најмалку километар. Не смее да прави напори кое не се однапред предвидени од лекарскиот тим и единствената „забавна“ активност која му е дозволена се аматерските голф-турнири низ Шпанија.

Освојувачот на 11 грен слем титули неколку пати во кариерата имаше паузи поради коленото, најдолго во 2009 година, два и пол месеци, но ова отсуство е со највисоко ниво на тревога. Дијагнозата овој пат е патела тендинитис, или воспалание на тетивите во десното колено. Последниот меч Надал го одигра на Вимблдон, кога во второто коло загуби од Лукаш Росол. Сега открива дека играл со болка и под инекции и дека ако го пропуштеше Вимблдон, најверојатно, ќе беше присутен на сите турнири што ги пропушти (ОИ, УС опен, Дејвис куп).

„Можеби беше грешка што играв на Вимблдон, но тешко е да запрете кога игратет добро. На Ролан Гарос морав да играм под дејство на антинфламаторни седативи за да стигнам до целта и затоа потоа се чувствував многу лошо“, открива Шпанецот. „Потоа имав катастрофални подготовки за Вимблдон, а првото коло го играв под инјекции. А тоа не е добро за коленото, особено не на долг рок“, објаснува Рафа. Тој не е првиот што игра тенис под седативи меѓутоа, еден од ретките што освоил титули на тој начин. „Проблемот кога играте под седативи е тоа што кога трчате, не чувствувате болка, но при секој чекор размислувате каде и како ќе згазнете. Не се игра така тенис“, сподели Надал.

Позанто е веќе колкава беше неговата болка додека следеше Олимпијада како гледач, меѓутоа неговите навивачи од ова интервју читаат дека Надал ќе се оспособи да игра и ќе продолжи да ја полни својата колекција. Со 11 титули од грен слемите тој е на делба на третото место на вечната листа, а со вкупно 50 титули од сите турнири, го држи деветтото место во историјата. Негов последен трофеј беше седмиот на Ролан Гарос овој јуни.