Блок-билетите за Хрватска и Србија по 200 денари?

Конечната одлука за билетите за мечевите против Хрватска и Србија, ФФМ треба да ја даде во првите денови од октомври, откако ќе заседава Управниот одбор

Навивачите на фудбалската репрезентација на Македонија ќе можат да ги проследат по вкупна цена од 200 денари квалификациските натпревари од групата А за Светското првенство 2014 во Бразил против Хрватска и Србија на арената „Филип Втори“. Во Фудбалската федерација на Македонија размислуваат за средбите од второто и од третото коло закажани за 12 и 16 октомври да пуштат блок-влезници, со тоа што за Источната и за Западната трибина тие би чинеле 200 денари, а за Северна и за Јужна цената ќе бидат 700 денари. Фановите што ќе сакаат да проследат само еден натпревар од квалификациите за СП ќе треба да издвојат 400 денари (север-југ) или 150 денари (исток-запад).

Конечната одлука за билетите за мечевите против Хрватска и Србија, за кои уште по враќањето на репрезентативците од Шкотска има голема заинтересираност во Македонија, ФФМ треба да ја даде во првите денови од октомври, откако ќе заседава Управниот одбор.

Голем интерес за квалификациските мечеви пројавија и гостинските навивачи. Но, според правилата, ФФМ одобрила само по 1.600 билети за двата меча, иако неофицијално, побарувањата биле неколкупати повеќе. Цената на билетите за хрватските и српските навивачи ќе се движи од 20 до 40 евра.

Дуелите со Хрватска на 12 октомври и со Србија четири дена подоцна во Скопје се закажани за во 20,30 часот. (М.К.)