Татран бара службена победа над Металург и 15.000 евра

Словенечката екипа Татран од раководството на Регионалната ракометна лига (СЕХА) побара службена победа над Металург поради тоа што македонскиот шампион не допатува на мечот од првото коло во Прешов. Покрај службените бодови, Словаците побараа и отштета од 15.000 евра поради загубена заработувачка од телевизиски права, продажба на влезници и слично.

Металург не отпатува во Прешов на мечот закажан за минатата сабота поради неможноста навремено да обезбеди авионски превоз по тукушто завршените квалификации за Лигата на шампионите во местото Рикин кај Осло. Тогаш раководството на клубот излезе со соопштение во кое стоеше дека официјалниот календар за новата натпреварувачка сезона го добиле на 7 септември, па за два дена не било изводливо да најдат авиобилети за голема група. Металург направи обид да го редуцира тренерскиот и играчкиот кадар на само 15 лица само да го реализира патувањето, но ниту тоа не им помогна.

Втората варијанта на која размислуваше управата на клубот беше автобуски превоз, но 20 часа патување до Прешов беа големо малтретирање за ракометарите во пресрет на скорашниот старт во Лигата на шампионите.

Барањето за одложување на мечот во Прешов македонскиот тим веднаш го испрати и до Словаците и до челниците на СЕХА-лигата, барајќи првиот дуел да го одиграат во Скопје кога Татран ќе му гостува Ловќен во Цетиње.