24.09.2012, 14:10 Студентите по танц со претстава ја почнаа академската година
Во 2013 година ќе дипломира првата генерација на студенти на Танцовата академија - Скопје
Со сегменти од претставата „Меѓусвет“ во кореографија на Рисима Рисимкин, вчера на сцената „Зебра“ почна првиот академски час на Танцовата академија Скопје, како поздрав за новите студенти по современ танц. „Нашите студенти се во одлична форма. Тоа е така затоа што летово ни беше работно“, рече на денешната средба со новинарите кореографот Рисима Рисимкин, директорка на Културниот центар „Интерарт“. „Работевме на два проекта, едниот во Битола на претставата ’Така зборуваше’ во режија на Звезда Ангеловска, а вториот беше гостувањето во Келн, Германија, кога на 30 и 31 август ја изведовме македонско-германската ’Човекот во ходникот‘, која премиерно се изведе на годинашното издание на ’Танц фест‘“.
Танцовата академија Скопје и Танцовиот театар, но и фестивалот „Танц-фест“, веќе трета година го поддржува амбасадата на Кралството Холандија. Амбасадорката Мариет Шурман, која присуствуваше на денешното свечено започнување на новата академска година за танчарите, рече дека за неа е огромно задоволство што е дел од проектите за современ танц.
„Танцовата академија Скопје е еден од нашите најуспешни проекти во Македонија. Рисима Рисимкин успеа да основа Танцова школа која е позната и надвор од земјава. Сега имаме Танцова академија Скопје, Танцов театар Скопје и ’Танц фест‘. Со тоа, модерниот танц во Македонија е во добар подем. За пофалба е и фактот што Академијата привлекува студенти и од странство. Она што е специфично за модерниот танц е тоа што тој им овозможува на младите да ги прошират своите хоризонти, да размислуваат поинаку од шаблонот. Во 2013 година ќе дипломира првата генерација на студенти и убедена сум дека тие ќе станат амбасадори на културата на Македонија и дека ќе бидат добар модел за идните генерации. Тоа ќе им го отвори светот. Им посакувам се' најдобро на новите студенти и среќни и инспиративни три години“, рече Шурман.
Рисима Рисимкин, која е основач на Танцовата академија - Скопје, истакна дека за неа е голема радост што има нови студенти. Годинашнава учебна година стартува под мотото „Да го разбудиме танцот во нас“. „Досега остваривме шест проекти, новооформени продукции за само две години, што е голем успех“, рече Рисимкин. Таа се пофали дека сезоната ја почнале во Келн на Саемот за танц каде што оствариле контакт со професори од реномираната школа „Џулијард“ во Њујорк и очекуваат следната година во Скопје да гостува кореографката Џенис Бернер, која ќе работи со македонските студенти. Рисимкин додаде и оти годинава студентите ќе имаат можност да работат со кореографи од светот, но и со македонски, меѓу кои Олга Панго и Игор Киров.
Во однос на меѓународните активности на македонските студенти по танц, Рисимкин го издвои тринеделниот престој на двајца студенти во балетот „Скапино“во Ротердам, Холандија, што ќе се случи во јануари, како и гостувањето на танчарката Матеја Киселички во Њујорк во октомври, каде што ќе биде дел од тамошната танцова сцена. (Т.И.)
|
