20.09.2012, 15:55 Волшебните „Дед кен денс“ вечерва во Солун
Концертот на „Дед кен денс“ во нашата најблиска културна дестинација е предизвик и за голем број македонски фанови
Голем број македонски фанови на единствениот звук што долги години го негува австралискиот култен бенд „Дед кен денс“, денеска ќе се упатат на нивниот концерт во театарот „Earth“ во нашата најблиска културна дестинација Солун да бидат сведоци на моќното враќање на фантастичните Лиса Жерар и Брендон Пери. „Дед кен денс“ се на голема повратничка турнеја на која концертно го промовираат новиот албум насловен „Анастасис“, кој е нивен десетти, а се роди по пауза од цели 16 години.
„Анастасис“ е извонреден албум, што е реткост за бендовите кои повторно се соединуваат откако веќе своевремено ја исплукале, навидум, целата своја креативна енергија, но не и кога се работи за „Дед кен денс“ кои немаат промашување досега. „Анастасис“ не е само враќање на Жерар и Пери како „Дед кен денс“, односно потсетување на нивниот препознатлив и единствен звук кој во 1980-тите години ја промени сликата на т.н. алтернативна сцена, туку е издание кое нуди современи звучни аспекти, продукциски е беспрекорно сработено, комплексно е и во музиколошко-естетска смисла. Ова е силен, храбар, моќен албум кој слободно може да влезе во категоријата албум на годината. Осумте композиции сместени на него никого не оставаат рамнодушен. Тој нуди амбиент каков што одамна не сме доживеале, со целата симболика и мистичност својствена за бендот, и покрај разните обиди во овој контекст во светски рамки. Критиката веќе го опиша како музика која опива, милува, има моќ да ве однесе во меланхолија, предизвикува силни емоции, тера на размислување... И овде е присутен оној спој на источните мантри, африканските ритуални танци, црковното пеење, звукот на древните племиња, на старите цивилизации, на ренесансата, барокот, средниот век, неокласицизмот. „Музика која го пренесува духот на минатото во сегашноста“.
„Дед кен денс“, почнувајќи од првиот албум насловен по името на бендот од 1984 година, низ својата музичка кариера го интерпретираат патот на својот живот. Нивниот последен албум од 1996 година, „Spiritchaser“, беше најавен како крај на нивната кариера како група. Затоа и ова нивно ново обединување претставува огромна радост за многумина. (Т.И.) |
