Kонференција за е-Демократија во Охрид

Од 23-ти до 25- ти септември по трет пат ќе се одржи конференцијата е-Демократија, во организација на Некстсенс, заедно со Центарот за развој на е-Влада (the Centre for e-Governance Development) од Љубљана, Словенија. По двете претходно успешно одржани конференции, и оваа година во Охрид, ќе стане збор за улогата на информатичката технологија во јакнењето на демократијата и транспарентноста на јавните институции.

Конференцијата на едно место ќе ги собере најголемите регионални експерти од областа на електронската демократија и електронското владеење, меѓу кои и заменик-претседателот на Собранието на Република Македонија, Јани Макрадули и пратеникот Павле Саздов.

На отворањето на конференцијата воведно обраќање ќе имаат Кристофер Ивон, британски амбасадор во Република Македонија, Марта Арсовска Томовска, заменик министер за Информатичко општество и администрација и Крис Хеншоу, директор на Националниот демократски институт за Македонија.

Конференцијата за е-Демократија веќе трета година по ред добива огромна поддршка од страна на Делегацијата на Европската Унија во Република Македонија. Оваа година во име на Европската Унија на присутните гости на конференцијата преку видео линк ќе им се обрати европратеникот и известувач на Европскиот парламент за Република Македонија, Ричард Ховит.

На конференцијата преку пет панели ќе бидат опфатени најактуелните теми во областа на електронската демократија: употребата на нови технологии за мониторирање на транспарентноста на јавните институции, следење и усогласување со промените во законската регулатива, социјалните медиуми како нови и иновативни алатки за зголемување на учеството на граѓаните во работата на парламентот, владата и останатите јавни институции итн.

Повеќе информации за конференцијата можете да најдете на www.e-democracy.mk .