Милиони отштета за бели дробови од пуканки

Американец доби отштета од 7,2 милиона долари откако тврдеше дека му се појавиле „бели дробови од пуканки“ од вдишувањето вештачки путер од пуканките подготвувани во микробранова печка.

Порота од Колорадо се согласува со Вејн Вотсон дека произведувачот на пуканки требало да има предупредувачки ознаки дека гасовите од ќесичката е опасно да се вдишуваат.

Адвокатите на одбраната тврдат дека проблемите на Вотсон потекнуваат од долгогодишното работење со хемикалии за чистење теписи. Кај него се јавиле респираторни проблеми во 2007 година откако редовно јадел пуканки.

„Бели дробови од пуканки“ е форма на незапирлива опструктивна болест на белите дробови што остава лузни на белите дробови и го отежнува протокот на воздух.

Пресудата е најнов случај во серијата успешни случаи, вклучувајќи ги и оние на работниците во фабрика за пуканки кои се разболеле. Во тие случаи состојка од зачините „дијацетил“ се поврзува со здравствените проблеми.

Поротниците утврдиле дека корпорацијата „Гилстер-Мери Ли“, произведувач на пуканки со приватни ознаки, е одговорна за 80 отсто од оштетувањата. Супермаркетот „Крогер компанија“ се смета одговорен за другите 20 отсто.

Претходно, Вотсон се договорил со компанијата за зачини „ФОНА интернешенел“. „Произведувачот на пуканки не направил апсолутно никакви испитувања за да помисли дека потрошувачот можеби е изложен на ризик“, изјави Вотсон за Си-Би-Ес њуз.

Случајот на Вотсон беше потпомогнат од сведочењето на д-р Сесил Роуз, лекарката која му ја дијагностицирала таа состојба. Таа била консултант на индустријата за зачини и забележала дека болеста што се развила кај Вотсон ја имале работниците изложени на хемикалијата, јавува Ројтерс.