„Блиц“ го препорачува Охрид за есенски одмор

Во српскиот дневен весник во текст насловен „Посетете го македонскиот Свети Стефан“, Охрид е наречен „бисерот на Македонија и на Балканот“

Српскиот дневен весник „Блиц“ во денешното издание објавува текст во кој на своите читатели им го препорачува Охрид како посакувана туристичка дестинација, место за краток одмор или починка од секојдневните работни обврски.

Во текстот насловен „Посетете го македонскиот Свети Стефан“, Охрид е наречен „бисерот на Македонија и на Балканот“, град со историја, бројни манастири, колевка на православната духовност.

Според „Блиц’’, српските туристи се повеќе му се враќаат на Охрид како мошне популарна дестинација, а на оние што никогаш не биле тука им препорачува дека токму сега е вистинското време за посета. За оние што биле во Охрид, весникот пишува дека сега е идеално време повторно да отидат, да се потсетат на убавите мигови минати таму, да доживеат нови незаборавни сеќавања.

- Прекрасното езеро е погодно како за младите, кои таму ќе најдат бројни места за забава, така и за семејствата со деца кои во Охрид ќе најдат совршено место за одмор. Идеално е бидејќи за секого може да се најде по нешто, а никој нема незадоволен да се врати дома, објавува меѓу другото „Блиц“.

Преку весникот за ноември се нудат и двоедневни аранжмани за Охрид со вклучен автобуски превоз.

Неодамна за Охрид како атрактивна туристичка понуда пишуваше и српскиот весник „Политика“ преку своето издание за дијаспората „Европски новости“ што се печати во Франфурт. Во илустрираната репортажа на две страници беше нагласена охридската туристичка понуда, со богатото културно-историско наследство што го поседува Охрид, бројните културни збиднувања...

Едночасовна репортажа за убавините на Охрид пред неколку дена беше емитувана и на сателитската програма на Радио-телевизијата на Србија, во емисијата „Таблоид“, продукција на Телевизија Нови Сад.

Српските туристи години наназад се меѓу најбројните гости на Охридската ривиера, но и посакувани гости од охридските туристички работници, меѓу другото и поради тоа што важат за добри потрошувачи.