20.09.2012, 15:59 Аризанов: СДСМ води дволична политика за земјоделците
Кавадарци - „Опозициската СДСМ води дволична политика која не поминува кај земјоделците. Едно зборуваат на митинзи, а друго во парламентот“, рече денеска лидерот на лозарите и претседател на регионалниот сојуз „Агротиквешија“, Љупчо Аризанов револтиран од гласањето на опозицијата против Законот за земјоделство и рурален развој.
Аризанов смета дека со недонесувањето на овој закон се доведени во прашање интересите на земјоделците на кои им се нанесува огромна штета.
„Со Законот најпрвин ќе се решеа социјалните случаи кои требаше да добијат земјиште на плодоуживање, како и парична помош од државата во висина од по 120.000 денари. Со тој закон требаше да се реши пензиското и инвалидското осигурување на земјоделците, а со недонесувањето ниеден земјоделец не може да замине во пензија. Да не зборуваме дека со тој закон се регулира и исплатата на земјоделските производи во кои спаѓа и грозјето“, рече Аризанов кој смета дека земјоделството е фабрика на отворено, па земјоделските култури секојдневно се изложени на временски непогоди, а со недонесувањето на законот штетите не можат да бидат надоместени од страна на државата.
Според лидерот на лозарите, СДСМ води мангупска и дволична политика, бидејќи, како што рече земјоделецот јасно гледа кој сака да ги реши проблемите во земјоделството, а кој прави опструкции. (А.Д.)
|
