Се истражува „руската врска“ во убиството на Литвиненко

Новата истрага што во Лондон ќе се води за убиството на Александар Литвиненко, поранешен оперативец на руската разузнувачка агенција, ќе ја испитува „руската врска“ во ова убиство.

Британскиот адвокат Бен Емерсон, кој е правен застапник на сопругата на убиениот, Марина Литвиненко, изјави синоќа дека истрагата ќе треба да го испита тврдењето за „вмешаност на русуката влада“ во труењето и смртта на Литвиненко, кој пред да биде убиен, доби британско државјанство.

Литвиненко по бегството од Русија, делуваше како политички дисидент и остар критичар на политиката на претседателот Владимир Путин. Во ноември 2006 година тој беше отруен во бифето на еден лондонски хотел, за време на средбата што ја имаше со двајца Руси, откако во неговиот чај беше истурен радиоактивниот полониум 210.

Литвиненко умре две недели подоцна, во една лондонска болница, а Скотланд Јард, по спроведената истрага како виновник го посочи Андреј Луговој, поранешен оперативец на руската тајна служба, а сега пратеник во Русија. Британското обвинителство побара од руските власти екстрадиција за Луговој, уште пред тој да влезе во политиката, но официјална Москва го отфрли таквото барање.

Луговој и тогаш и сега тврди дека тој нема никаква врска со смртта на Литвиненко и вината ја префрла на, како што вели, британските разузнавачки агенции. Новата истрага ќе се одржи на почетокот од идната година, а како сведоци би можеле да бидат повикани, покрај сопругата и синот на Литвиненко и Борис Березовски, најпознатиот руски дисидент во странство кој десет години живее во Велика Британија и со кого убиениот со работуваше, како и британскиот министер за внатрешни работи Тереза Меј. На сослушувањето одново би можел да биде повикан и Луговој, а не се знае дали како сведок ќе се појави и вториот Русин, Дмитриј Ковтун, кој беше на средбата со Литвиненко и Луговој, но не беше осомничен од Скотланд Јард за вмешаност во убиството.

Адвокатот Емерсон вели дека доколку се докаже постоењето на „руската врска“, во што тој и Марина Литвиненко веруваат, тогаш убиството на нејзиниот сопруг ќе биде „акт на од држава спонзориран нуклеарен тероризам“ на британските улици. Во текот на истрагата ќе бидат „затворени за јавноста“ деталите од заклучоците на Скотланд Јард за кои постои сомнеж за можната соработка на убиениот со британската разузнавачка агенција МИ6, веднаш по неговото бегство од Русија.