Прва жртва на западнонилска треска во Македонија

На Инфективната клиника во Скопје денеска почина 53-годишна жена како последица на овој вирус. Лицето било хоспитализирано уште на 11 септември и Клиниката за тоа го известила Министерството за здравство

На Клиниката за инфективни болести во Скопје денеска почина жена од вирусот на западнонилска треска. Пациентката била на возраст од 53 години и починала со дијагноза енцефалитис, воспаление на мозокот. Тоа е првиот смртен случај во земјава на заболен од ова опасно заболување, од вкупно трите пријавени случаи.

„Станува збор за ризичен пациент кој претходно боледувал од дијабетес, хиптертензија и зголемена телесна тежина. Лицето на Клиниката било хоспитализирано на 11 септември. Второто лице е на возраст од 66 години со дијагноза менингоенцефалитис и во моментов е во добра општа состојба, во фаза на излекување. Третото лице е дете хоспитализирано на Клиниката за инфективни болести, родено во 2005 година, со дијагноза менингитис и тоа е во добра општа состојба и во фаза на излекување“, рече на денешната прес- конференција на Клиниката, министерот за здравство Никола Тодоров, според информациите добиени од Институтот за јавно здравје на Македонија.

Според направените анализи, посочи тој, се потврдува присуството на вирусот на западнонилска треска и во Македонија, како и во поголемиот дел од соседните земји - Грција, Србија, Хрватска, како и во Романија, Русија, Италија, САД...

„Лани имаше четири позитивни случаи на западнонилска треска, кои беа успешно излекувани. Тоа е заразно заболување, кое се пренесува на човек при каснување од комарец и може да предизвика сериозни заболувања од кои најопасното е менингитис, енцефалитис и полиомиелитис (парализа)“, потенцира Тодоров.

Тој истакна дека досега се преземени превентивни мерки, односно подготвен е Акциски план за превенција од вектор-преносливи болести со посебен акцент на комарци и крлежи. Во над 70 проценти од општините е веќе извршено мапирање на теренот, исушување на застоените води и спроведена е ларвицидна и адултна дезинсекција, која е најдобра превентивна мерка за уништување на комарците. Според Тодоров, подготвени се брошури за населението со информативно-едукативни мерки за превенција од каснување (сушење на застоени води, бари, поставување мрежи на прозорци и врати за заштита со средства против комарци.

Директорот на Инфективната клиника, Звонко Миленковиќ, рече дека лекувањето на пациентите не подразбира само лекови, туку услови за лекување, персонал и обучен ка��ар.

„При вакво лекување не постои каузална терапија. Клиниката долго време и целиот здравствен систем веќе две години се подготвуваа за ваков одговор“, додаде Миленковиќ.

Голубинка Бошевска од Институт за јавно здравје истакна дека примероци од лабораториските анализи ќе бидат испратени во клиниката „Роберт Кох“ во Берлин каде што ќе се направи обид за изолација на вирусот и ќе се утврди за кој тип станува збор.

Во Грција досега се потврдени 129 случаи на заболени од западнонилска треска од кои осум се починати. Во Србија 30 лица се заболени од кои пет се починати, а во Хрватска има регистрирано три случаи на заболени.

Додека во Европа има повеќе од 529 случаи на инфекции со западнонилскиот вирус. Во САД се регистрирани над 2.636 заболени од кои 118 се починати.

Инаку, во 80 отсто случаи оваа инфекција од комарец минува без симптоми, а во 20 отсто случаи се развива болест главно со умерени симптоми карактеристични за настинка или грип. Ретко се развива во менингоенцефалитис (воспаление на мозокот), првенствено кај стари луѓе или лица со намален имунитет. (М.Т.)