Константин го сопна МЗТ Скопје

Составот на Александар Тодоров на големо изненадување беше совладан од тимот од Ниш со 70:68 и остана без финалето на „Купина купот“

МЗТ Скопје се сопна на првата средба во Ниш. Во полуфиналето на „Купина купот“ македонскиот шампион не успеа да го добие организаторот Константин, кој од оваа сезона ќе се натпреварува во најсилната српска лига. Составот на Александар Тодоров на големо изненадување беше совладан од тимот од Ниш со 70:68 и остана без финалето, па вечерва против Раднички Крагуевац треба да игра за третото место.

МЗТ Скопје во последната четвртина имаше водство од девет поени, но средбата ја загуби во последните четири минути кога на домаќинот му дозволи да направи серија 13-4 за недозволив пораз од тим што до минатата лига беше во втората српска лига. Кејд Дејвис и Дамјан Стојановски беа најефикасни во редовите на македонскиот тим постигнувајќи по 17 поени.

МЗТ Скопје од утре ќе биде во Скопје каде што ќе се доподготвува за дебито во АБА Јадранската лига на гостувањето кај Цибона закажано за 29 овој месец. (М.К.)