ЖРК Металург поразен од Бјосен

Во квалификациите од Лигата на шампионите домаќинот Бјосен извојува победа над македонските ракометарки од 29:19 (16:7) 

Ракометарките на македонскиот првак ЖРК Металург доживеаја пораз во полуфиналето од квалификационата група 2 за пласман во Лигата на шампионите. На гостувањето во Трондхајм, домаќинот Бјосен постигна победа од 29:19 (16:7).

Решавачката предност Бјосен ја направи во воведните минути кога поведе со 8:0, а дури потоа Металург почна да постигнува голови.

Головите за ЖРК Металург ги постигнаа: Драгана Пецевска 4, Робертина Мечевска 3, Мирјета Бајрамовска 3, Наташа Младеновска 3, Соња Башиќ 2, Ана Милачиќ 2 и Олга Вашчук 2.

Најефикасна за Бјосен беше Ида Алстад, која постигна 12 гола.

Утре ЖРК Металург во терминот од 15:30 часот ќе игра со поразената екипа од второто полуфинале Букстехуде – Далфсен, додека Бјосен со победникот ќе игра за пласман во групите од Лигата на шампионите.