20.09.2012, 15:36 „Џонсон Мети“ доби А-интегрирана еколошка дозвола
На компанијата „Џонсон Мети“ и' беше доделена А-интегрирана еколошка дозвола, според Законот за животна средина. Со дозволата се уредува работата во делот на заштитата на животната средина. Конкретно се утврдуваат проектите и инвестициите што треба да се направат во делот на складирањето и ракувањето со суровините и помошните материјали, како и постапките за емисиите во воздухот.
Директорот на компанијата во земјава, Џатин Таркар, истакна дека ова е важен чекор за нивниот бизнис. „Дозволата е одлична рефлексија на големиот успех кој го имаме во Македонија“, потенцира Таркар.
Вицепремиерот Владимир Пешевски истакна дека „Џонсон Мети“ е првата компанија во земјава која најверојатно ќе ја пробие границата на вкупен извоз од преку 500 милиони евра оваа или следната година. „За нас е важно, компаниите кои се наоѓаат во слободните економски зони целосно да ги почитуваат барањата од државата во однос на еколошките стандарди кои треба да ги исполнуваат“, изјави Пешевски. (Ек.Р.)
|
