Анкета - Слупчане не е гест за помирување, Бесими да се извини

Мнозинството граѓани сметаат дека кризата треба да се надмине преку дијалог во институциите, а опцијата за ново мнозинство има најмалку приврзаници

Министерот за одбрана, Фатмир Бесими, треба да се извини за поклонувањето пред споменикот на ОНА во Слупчане, бидејќи тој чин не придонесува за помирување... Вака размислуваат мнозинството македонски граѓани, според резултатите од испитувањето на јавното мислење што го реализираа Институтот за демократија и Македонскиот центар за меѓународна соработка.

Во анкетата, што е спроведена од 14 до 17 септември, учествувале 1.100 испитаници, при што мнозинството од нив (58 проценти) се изјасниле дека настанот во Слупчане не придонесува кон помирување, а спротивен став имале 31 процент. Резултатите од одговорите на ова прашање јасно упатуваат на голем јаз во ставовите меѓу етничките Албанци и Македонци. Тоа дека Слупчане е гест за помирување сметаат 80 проценти од анкетираните припадници на албанската заедница, додека негативен одговор имаат 73 проценти од етничките Македонци. Според Институтот за демократија, најголем процент на испитаници кои одговориле со „не“ се од од високообразованата популација (79 проценти). Со постапката на министерот, генерално, не се согласуваат и испитаниците над 60 години.

Слични се параметрите на прашањето дали министерот Бесими треба да се извини за настанот во Слупчане, кој беше увертира во владината криза. Од вкупниот број анкетирани, дека Бесими треба да се извини се изјасниле 60 проценти, од кои 78 проценти се Македонци, додека дека нема потреба од извинување сметаат 29 проценти, од кои 83 отсто се Албанци.

Речиси половината од и��питаниците (49 проценти) сметаат дека кризата треба да се надмине преку дијалог во институциите. Најмалку приврзаници, пак, има опцијата за ново парламентарно мнозинство без ВМРО-ДПМНЕ (13 проценти), додека за два процента е повисока бројката на анкетирани кои се за предвремени избори (15 проценти). Дека не постои криза сметаат 10 отсто од испитаниците. (П.Р.)