Бостон со рекорден пресврт во однос на ланската сезона
„Келтите“ славеа над Шарлот и стигнаа до 61:15 во победи во регуларниот дел од НБА
Бостон во саботата настапи без својата ударна тројка, но и без неа успеа да го подобри рекордниот пресврт во однос на регуларниот дел од минатата сезона во НБА, славејќи лесна победа од 101:78 над Шарлот. Кевин Гарнет и Реј Ален се одмораа, а Пол Пирс беше дома за да го прослави раѓањето на својата ќерка во петокот, но тоа не ги спречи „келтите“ за да си ја обезбедат предноста на домашниот терен на стартот од плеј-офот.
„Кога би можеле да напишете водич како да се стигне до предност на домашниот терен, тоа веројатно би изгледало вака“, изјави тренерот Док Риверс откако Леон Поу постигна 22 поена и забележа девет скока во шестата победа на Бостон во низа. Емека Окафор прокнижи 17 поени и осум скока за Шарлот, кој со овој пораз е елиминиран од трката за разигрувањето за титулата.
Селтикси, кои добија големо засилување во Гарнет и во Ален по завршувањето на ланската сезона, веќе додадоа 37 победи на минатогодишните 24 и им остануваат уште шест натпревари од регуларниот дел. Со тоа тие го урнаа рекордот на Сан Антонио од сезоната 1997/98, кога „мамузите“ од резултат 20:62 во претходната сезона стигнаа со 56:26 во дебитантската година на Тим Данкан во НБА.
Бостон, кој има скор од 33:6 во победи пред своите навивачи, обезбеди и предност на домашниот терен низ плеј-офот, вклучувајќи го и евентуалниот седми меч од големото финале, ако стигнат дотаму.
„Конечно знаеме дека, ако стигнеме до последната средба сезонава, таа ќе се одигра во Бостон“, изјави Риверс. „Тоа е добро“.
Други резултати од саботата: Денвер - Сакраменто 115:118, Кливленд - Орландо 86:101, Филаделфија - Атланта 85:92, Њу Џерси - Торонто 99:90 и Чикаго - Вашингтон 87:99.
Резултати од петокот: Торонто - Шарлот 100:105, Атланта - Филаделфија 104:109, Вашингтон - Мајами 109:95, Детроит - Њу Џерси 106:87, Мемфис - Голден стејт 86:117, Њу Орлеанс - Њујорк 118:110, Јута - Сан Антонио 90:64, Милвоки - Индијана 101:105, Феникс - Минесота 117:88, Лос Анџелес Лејкерс - Далас 112:108 и Сиетл - Хјустон 66:79. |
