Кирил Дојчиновски на кормилото на Вардар
Еден од најискусните фудбалски тренери во земјава, Кирил Дојчиновски повторно се најде на кормилото на нашиот најтрофеен клуб Вардар. Дојчиновски со одлука на новото раководство на црвено-црните ќе го предводи тимот до крајот на оваа натпреварувачка сезона. Во Стручниот штаб на Вардар ќе му помагаат Драги Сетинов и Јовче Џипунов. Црвено-црните добија и нов в.д. директор во Мирко Спасески кој ќе ја обавува функцијата до крајот на сезоната.
До помалку или повеќе очекуваната смена на кормилото на Вардар дојде на попладневниот тренинг во петокот кога новиот тренер им беше претставен на фудбалерите. Главната цел на новиот Стручен штаб ќе биде Вардар во годинашната сезона да избори пласман на европската фудбалска сцена преку Купот на УЕФА или Интер-тото купот, бидејќи шампионската титула за црвено-црните е загубена од поодамна.
Дојчиновски има големо тренерско искуство. Во земјава тој ги предводеше екипите на Пелистер и Брегалница Штип, а едно време беше прв тренер и на грчкиот тим Ираклис. Во неговата тренерска кариера Дојчиновски беше селектор на репрезентацијата на Салвадор. Дебито на клупата на Вардар, новиот тренер го имаше вчера на мечот со Цементарница 55 на Градскиот стадион во Скопје. Во исто време на спортската јавност во земјава и се обратија и поранешните вардарци поддржувачи на идејата за спас на Вардар, кои апстинираа на вториот прес на ИО и не се појавија на Собранието кое се одржа во „Холидеј ин“. Тие најавија дека ќе ги консолидираат своите редови и дека на најавеното Редовно Собрание на Вардар во јуни ќе се појават со свој претседателски кандидат и ќе понудат ново раководство на тимот кое ќе заслужува комплетната поддршка од јавноста и симпатизерите на црвено-црните. (Е.К.) |
