Филип се исправи во Битола

БИТОЛА - Плоштадот „Магнолија“ вчера се закити со споменикот на Филип Втори. Основачот на Хераклеја Линкестис, кој три години стоеше во задниот дел од општинската зграда, конечно, се исправи во срцето на Битола. Вчера изутрина, пред 7 часот, започна поставувањето на споменикот на мермерниот постамент што е дел од еден комплекс на површина од 100 квадратни метри.

Филип Втори е прикажан со прстот вперен кон народот и заедно со постаментот е висок околу осум метри. Во непосредна близина на споменикот локалната самоуправа изгради и фонтана со штитови, која во вечерните часови функционира низ синхронизирана музика и светлосни ефекти, со што привлекува дополнително внимание на Широк сокак.

Но, за поставувањето на споменикот на античкиот крал немаше никаква најава од Општината. Исклучок се само неколкумина новинари што за настанот би��е информирани ноќе, околу 2 часот, со СМС-порака. Другите медиуми случајно разбраа за намерата на Општината.

Битолскиот градоначалник, Владимир Талески, пред споменикот примаше честитки од граѓаните, но не сакаше да даде изјава. Кревајќи раменици само кусо рече дека се' е кажано. „Немам коментар, настанот зборува сам за себе“, рече тој.

Талески не сакаше да прецизира ниту кога свечено ќе биде откриен споменикот, дали ќе се совпадне со Денот на независноста, 8 Септември, за кога е најавена свеченост во Скопје за споменикот на Александар Македонски. Во исто време останува непознато колку пари ја чинеше Општината споменикот на античкиот крал.

А битолчани од рано утро со внимание го следеа поставувањето, едни воодушевени и горди на споменикот, а други разочарани, негодуваа.

„Многу е убав, ја заличи Битола. Ова е многу добро за историјата на нашиот народ. Одамна требаше да биде поставен, овој човек го основал градот. До каде ќе не' однесе оваа Влада, фабрики треба да отвора, а не да гради споменици. За среќа, се' уште не јадеме бронза“, беа најчестите коментари од насобраните граѓани.

Велешанецот Ангел Коруновски е автор на скулптурата. Филип Втори е негов втор споменик во Битола по неодамна поставениот „Ангел“ посветен на бранителите од 2001 година. Споменикот на Филип е висок 3,60 сантиметри, тежи еден и пол тон. Лиен е во бронза во работилницата „Станишиќ“ во Нови Сад.

Коруновски објаснува дека Филип го прикажал како голем државник, а не како воин. Цел му било да се покаже дека тој е првиот крал што го обединил народот на овие простори.

„Битно ми беше овој споменик да има порака. Затоа Филип Втори има дијадема, а не капа. Разиграниот коњ прескокнува карпа, тоа е симбол на силата. Важен е и естетскиот момент. Фигурата на Филип Втори не е во природна големина. Значи, во издолжена форма што дава многу убав ефект. Совршена убавина“, објаснува Коруновски. Тој тврди дека проектот, леењето, вклучително и неговиот хонорар изнесува околу 115 илјади евра.

Во отсуство на официјални податоци, колку чини постаментот од мермер, фонтаната и другите елементи, опозицијата пресметала дека општината потрошила над 600 илјади евра. Вчерашното поставување на споменикот не помина без критики од опозицијата во Советот. А претставниците на власта се задоволни од реализираното.

„Се виде дека тоа што споменикот стоеше три години зад општинската зграда не било вина ниту на опозицијата ниту на новинарите, туку на Владата. Сега падна наредба од централата. Но, очигледно Брисел е иритиран со ваквите постапки. Светска банка и ММФ не даваат кредити за изградба на споменици, туку за развој на државата. Лош е тајмингот кога се поставува споменикот, бидејќи сега имаме поприоритетни теми за решавање“, изјави Горан Милевски од ЛДП.

„Па, ова навистина станува збор за судир на концепти. На едната страна Европа и меѓународната заедница, а на другата страна ВМРО-ДПМНЕ и Македонија како заложник“, изјави Томе Наумовски од СДСМ. (А.Б.)