Поглед

Евтина ешерихија

Александрија Стевковска

Зеленчукот поевтини. Освен што е евтин и безбеден, или барем така не' уверија одговорните лица во државава за контрола на храната. Тоа значи дека сезонава барем слободно ќе јадеме свеж зеленчук, со оглед на тоа дека лани доматите и краставиците беа изгор скапи, па на пазарите не можеше да се приближиме, а не, пак, слободно да се купува и да се јаде. Консумирањето салата лани беше ретка можност, за разлика од годинава кога требаше да се случи бактеријата ешерихија коли за да цените на зеленчукот се оладат и да ни нудат можност евтино да го преживееме летово.

Во вакви случаи секогаш има и губитници и добитници и никој нема право да се лути. Лани добивка забележаа земјоделците и трговците, кои просто ги дереа потрошувачите со високите цени на зеленчукот. Тогаш ним им беше добро и глас не им се слушаше, а граѓаните лелекаа, притиснати од нискиот стандард и од високите цени. Сега е обратно. Производителите и трговците плачат и се жалат дека се на работ на пропаста, а граѓаните се задоволни што конечно можат да си дозволат да купуваат зеленчук во поголеми количини за разлика од минатата година кога се купуваше на грамови и на парче.

Значи, тркалото се врти, оној што годинава ќе ќари, в година ќе изгуби, но никогаш не треба да се заборави дека работите се менуваат и дека никој не треба да мисли ако една сезона е во плус, дека ќе биде и наредната. И сега одеднаш Владата реши да им помогне на производителите на домати и на краставици, додека лани не мрдна со прст за да им помогнат на граѓаните за да им го закрпи скинатиот стандард.

Како и да е, годинава потрошувачите се во добивка и треба да ја искористат можноста евтино и здраво да се хранат.