Им се вкрстија патиштата на Бранко и на Љупчо

Рамковниот договор - нитка што ги спојува Црвенковски и Георгиевски, а ги разделува Ахмети и Груевски

Светлана Унковска

Една деценија по потпишувањето на Охридскиот договор, повторно им се вкрстија патиштата на поранешните лути противници, Љупчо Георгиевски, тогашен претседател на ВМРО-ДПМНЕ, и Бранко Црвенковски, тогашен и сегашен лидер на СДСМ. Деновиве Георгиевски и Црвенковски седеа заедно на трибината „Охридски рамковен договор - кон членството на Македонија во ЕУ и во НАТО“. Заедничка им е и констатацијата дека Рамковниот договор е процес витален за иднината на земјава. До нив беше и тогашниот водач на ОНА, Али Ахмети, кој за време на конфликтот беше од другата страна на „нишанот“. Сега е лидер на ДУИ.

Меѓутоа, на јубилејната прослава не дојде ниту еден од раководството на ВМРО-ДПМНЕ, како партија што е потписник на мировниот договор. Не се појави ниту претставник на ДПА, иако во 2001 година Арбен Џафери го држеше едно од четирите пенкала, а во преговорите силно се залагаше за постигнување договор. Познато е дека на претседателот на ВМРО-ДПМНЕ, Никола Груевски, не му се слуша многу кога се во прашање принципите и духот на Рамковниот договор. ДПА, пак, го прогласи тој документ за мртов и бара нов договор меѓу Македонците и Албанците.

И ако десетгодишнината од Охридскиот договор ги спои Црвенковски и Георгиевски, тоа не се случи со старо-новите коалициони партнери Ахмети и Груевски. Ахмети не дојде на прославата на 21. роденден на ВМРО-ДПМНЕ.

Сепак, дали пред десет години кога се потпишуваше мировниот договор можеше воопшто да се замисли дека некогаш Георгиевски и Црвенковски заедно ќе застанат во одбрана на Рамковниот договор. Се' уште не е избледена сликата кога Георгиевски го напушти приемот на шефот на државата, Борис Трајковски, во претседателската вила на Водно, веднаш по потпишувањето на договорот од страна на четворицата лидери. Денес Георгиевски вели дека Македонија многу вложи со Рамковниот договор и и' порачува на новата влада дека, ако пред десет години тој договор бил пресуден за опстанокот на земјава, сега тоа е влезот во ЕУ и во НАТО.

„Оној што сака да ја формира новата влада и кој сака да ја води македонската политика во идните четири години ако не е свесен што значи да остане надвор од евроатлантските интеграции, мислам дека не му е место во политиката“, порача Георгиевски. Тој и пред изборите говореше дека идната влада, која и да е, ќе мора да го реши спорот со името и на тој начин брзо да ја внесе Македонија во ЕУ и во НАТО. Ова што сега го слушаме како став на почесниот претседател на ВМРО-НП, Георгиевски, е многу блиску до поранешниот далечен ривал, Црвенковски, кој, исто така, вели дека гаранцијата за целосна имплементација на Рамковниот договор е членство во ЕУ и во НАТО. „Што сме поблиску до Брисел, мислам на НАТО и на ЕУ, тоа сме повеќе интегрирани, тука во земјава“, рече Црвенковски на прославата.

Приближените ставови на некогаш најоддалечените личности, беа препознаени во текот на оваа предизборна кампања, кога Георгиевски потенцираа дека за ВМРО-НП, СДСМ е многу поблизок од матичната ВМРО-ДПМНЕ. Но, таквата изјава на Георгиевски пред избори се покажа како проблематична и како „камен по своја глава“.