Анкета - Име што заслужува почит

Граѓаните поделени околу иницијативата за нова наградата „Киро Глигоров“ и можноста за чествување на првиот претседател

Димитар Николов, пензионер

Глигоров заслужува институција или објект со неговото име, но ова не е вистинското време за такво нешто. Мора да се почека... Како и за се' друго, и за ова не треба брзоплета ’градежна’ одлука, не треба да се спуштаме на такво ниво. Не може набрзина да се направи квалитетна градба. Инаку, добра е идејата и предлогот е на место. Тој е во групата на великани на Македонија, но мислам дека има премногу такви државни награди. Треба да се размислува за поинакво решение.. Можеби некаква стипендија, социјална помош, здружение за заштита на човековите права или, пак, слично како Борис Трајковски, фондација со името на Киро Глигоров.

Алексо од Скопје

Киро Глигоров го имаат помешано различни води, има прошетано по многу опции и беше обоен од повеќе бои. Јас пред пет-шест децении од Егејска Македонија се доселив во Скопје и досега никому не сум судел, нуту, пак, казнувал. Значи, немам ништо против човекот, но тоа ФИРОМ никако не можам да му го заборавам. Ме следи каде и да одам, па затоа сметам дека не треба да му се даде никакво признание. Да, тој има свои заслуги, но не доволно за да стои негово име на улица, сала, институција...

Милан Стојановски од Велес

Шетам и го разгледувам Скопје и слободно можам да кажам - дека единствениот што заслужува да има споменик или некакво признание е еден од членовите на АСНОМ, чија скулптура е веќе поставена спроти законодавниот дом. Киро Глигоров има позитивни заслуги и остварувања за државните интереси, внатрешната демократија, човековите права.. Долга е редицата на остварувања, па затоа мислам дека треба и мора да му се даде некоја награда или објект. Кога може името на Ристо Татарчев да стои на улица среде Велес, зошто во чест на еден Киро Гигоров да не се именува главна сообраќајница?

Зорица Антиќ од Скопје

Треба да има некакво обележје, но не од висок политички ранг. Знаете, во неговото време навистина можевме да напреднеме, но, еве, останавме за никаде... Само со вистински заслуги може да се стави некакво признание бидеќи само така не се иритира народот. Ако нема силни и видливи заслуги, народот ќе го почувствува тоа. Народот е суштината, народот е многу добар професор, оценувач, проценувач.

Крсте Крстевски од Скопје

Прво, тој беше голем човек. За Македонија дал повеќе отколку кој било друг. Не треба само да се стави неговото име на улица, ако за некои личности можеше да се направи и спортски центар... Киро Глигоров заслужува многу повеќе! Но, за жал, малку луѓе го разбираат тоа. Треба достоинствено да се преименува улица, треба да се направи и некој фонд. Ако ништо друго, најквалитетните луѓе од земјава преку тој фонд да студираат и се образуваат низ Европа и светот.