„Македонија пат“ на улица пред Влада

Вработените бараат да им бидат исплатени три плати и заостанати трошоци з�� теренска работа

Околу 500 вработени во јавното претпријатие „Македонија пат“ вчера протестираа пред Владата. Бараат да им бидат исплатени три плати и заостанати трошоци за теренска работа за дел од ланската и за цела годинашна зимска сезона.

Претставници на штрајкувачите беа примени во кабинетот на вицепремиерот за економски прашања, Владимир Пешевски, но од таму излегоа без ветувања. Како што појаснува претседателот на Синдикатот во „Македонија пат“, Стојан Попов, работниците не добиле никакви ветувања за платите, но за денеска е договорена средба на неколку министри, на која најверојатно ќе присуствува и директорот на претпријатието.

„Ако не ни бидат исплатени платите, ние не можеме да гарантираме дека ќе нема генерален штрајк и што е поважно, дека ќе нема блокада на патиштата. Ситуацијата е веќе критична и сега луѓето нема да избираат средства. Ние бевме максимално професионални и во текот на зимата немаше никакви блокади, ниту, пак, дозволивме патиштата да останат непроодни, редовно се чистеа онолку колку што можеме со нашата расположлива механизација. На тоа сме и законски обврзани, мораме да обезбедиме минимум услови за безбедно одвивање на сообраќајот. Но, сега веќе нема излез, луѓето немаат пари да се прехранат, а се трупаат и неплатените сметки за струја, вода, телефон“, вели Попов.

Вработените во „Македонија пат“ бараат да им бидат исплатени три заостанати плати, теренска работа за февруари минатата година, како и цела зимска сезона за 2012. Вкупно треба да им бидат исплатени околу 150 милиони денари. Велат дека моментално имаат заработено околу 80 милиони евра, но доколку им ги префрли Агенцијата за државни патишта, овие пари веднаш ќе се изгубат во наплатата на судските извршни решенија. Работниците, исто така, бараат од Владата да не ги менува толку често директорите на претпријатието и да го поддржи најновиот, Гајур Кадриу, кој го постави пред нешто повеќе од еден месец. Инсистираат тој да остане колку може што подолго за да се запознае што подобро со состојбите во претпријатието со цел побрзо и побезболно да се надминат проблемите. (Б.А.)