Полициска интервенција во ВМРО-Народна

Приврзаниците на Георгиевски тврдат дека по заминувањето на Додовски, од партиското седиште исчезнале компјутер, печат и штембил и материјали за работа

Светлана Унковска


Раководство на ВМРО-Народна партија повика вчера полиција во партиското седиште откако утврдило дека по заминувањето на довчерашниот претседател Марјан Додовски во ВМРО-ДПМНЕ, недостасуваат повеќе материјали и средства за работа на партијата. Веднаш по објавата на Додовски дека ја напушта партијата, ВМРО-НП свика итна седница на Извршниот комитет, но членовите, како што велат, биле непријатно изненадени откако забележале дека ги нема компјутерот, партискиот печат и штембил и многу материјали за работа. Уште понепријатно биле затечени кога откриле дека се исклучени телефоните и интернетот.

На Вонредната седница на Извршниот комитет, покрај тоа што била констатирана оставката на Додовски, била донесена и одлука со која украдените печат и штембил се прогласени за неважечки за, како што велат во партијата, да биде спречена евентуална злоупотреба.

„Утврдивме дека во просториите на партијата недостасуваат партискиот печат и штембил, компјутерот на кој е водено финансиското работење и е заведено членството на ВМРО-НП, како и голем дел од архивираниот материјал, цела финансиска документација и одлуки на партијата. Сето тоа беше во партијата до моментот додека со неа раководеше Додовски“, ни изјави Слободан Близнаковски, член на ИК и советник во Град Скопје од ВМРО-НП. Тој ги отфрла изјавите на Додовски дека целата партија преминува во ВМРО-ДПМНЕ, бидејќи, како што вели, таква одлука не е донесена од највисоките органи на ВМРО-НП.

„Одговорно тврдам дека никогаш никаде не е расправано за преминување во ВМРО-ДПМНЕ, туку, напротив, секогаш е дискутирано да го обединиме десниот опозициски блок. Единствен кочничар во овие процеси беше токму Додовски. Како партија, планираме во иднина, под раководство на Георгиевски, да ги продолжиме започнатите процеси“, вели Близнаковски.

Извори од партијата брифираат дека повеќе од три месеци Додовски одбегнувал да се сретне со партиското раководство и да даде извештај за финансиското работење на партијата, како и отчет за потрошените средства за предвремените избори. Наводно, откако бил притиснат од раководството, кое побарало од него на седница на ИК закажана за оваа сабота да достави увид за финансиското работење, Додовски го објавил напуштањето на партијата.

Додовски вчера не беше достапен за одговор на обвинувањата од довчерашните сопартијци. Од ВМРО-ДПМНЕ, пак, соопштија дека го поздравуваат „преминот на членовите и раководството на ВМРО-Народна партија“.

„Секој нов член значи растеж и поголем капацитет кој дава нова енергија за работа. Како партија ВМРО-ДПМНЕ останува широко отворена и со подадена рака за сите субјекти што ги поддржуваат нашите политики“, се наведува во партиското соопштение.

Раководството на ВМРО-НП за в недела закажа седница на Централниот комитет, на која Љупчо Георгиевски формално ќе биде избран за в.д. претседател, а најдоцна за 30 дена треба да се одржи и вонреден конгрес, по што тој ќе го преземе кормилото на ВМРО-НП.

На завчерашната седница на ИК, покрај Додовски, не присуствувала само уште Валентина Делиманчева, а нејасно е како ќе постапи генералниот секретар, Миле Јакимовски, кој е на пат надвор од земјава. Преминувањето на советникот во Град Скопје, Додовски, во ВМРО-ДПМНЕ нема да се одрази на распоредот на сили во Градскиот советот, бидејќи советничката група на ВМРО-ДПМНЕ и така е во мнозинство.

Се јавија и дел од општинските комитети на ВМРО-НП, кои тврдат дека партијата продолжува да функционира. „Изразуваме голема благодарност до Никола Груевски затоа што со поткупувањето на Додовски ни направија голема услуга да го врати Љупчо Георгиевски на чело на партијата“, изјави Ванчо Костовски, член на ИК и претседател на Општинскиот разгранок од Охрид.

Потврда за останување во ВМРО-НП стигнаа и од Шестата изборна единица. „Продолжуваме со работа во согласност со определбите и партиските заклучоци. Ги повикувам членовите и симпатизерите од цела Шеста изборна единица да не потклекнуваат на притисоците и лагите и да им веруваат на Извршниот комитет и на претседателот Георгиевски“, рече Драган Давидовски, челник на ВМРО-НП во Тетово.