Лустраторите ќе им се посветат на актуелните функционери

Комисијата за лустрација, по одлуката на Уставниот суд, нема да ги разгледува веќе досиејата на поранешните носители на функции

Жаклина Хаџи-Зафирова



Над 2.000 изјави од новинари, свештени лица и невладини организации пристигнале на адреса на Комисијата за лустрација, но тие наместо н�� работната маса на лустраторите, привремено ќе се складираат во архива. Лустраторите, по одлуката на Уставниот суд за привремено стопирање на процесот, нема да ги разгледуваат веќе досиејата на поранешните функционери, туку сега ќе се фокусираат на актуелните функционери. Решението на Уставниот суд, кое завчера преку курир беше доставено до институциите, ќе се разгледува на денешната седница на Комисијата за верификација на фактите. Уставниот суд, како што е познато, поведе постапка за 12 члена од Законот за определување дополнителен услов за вршење јавна функција и привремено го стопираше процесот со кој требаше да се чешлаат досиејата на поранешни функционери, вработени во медиуми, верски заедници и невладини организации.

Првиот човек на Комисијата за лустрација, Томе Аџиев, вели дека изјавите што ги примиле сега нема да ги разгледуваат, туку ќе се преориентираат на актуелните функционери.

„Ќе го почитуваме решението на Уставниот суд што ќе го разгледуваме на денешната седница“, ни изјави кусо Аџиев, не сакајќи да ја коментира одлуката на Судот. Она што е забрането нема да го работиме, но ќе продолжиме да го работиме она што не е забрането со закон“, коментира претседателот на Комисијата за лустрација.

Во законскиот рок, до 31 јануари, во Комисијата пристигнале 550 изјави од верските заедници, од медиумите од 520 медиумски работници, од невладините околу 700 и дополнително околу 300 изјави кои стигнале по пошта и се распоредуваат. Аџиев појаснува дека тие престануваат да работат по предметите, кои ќе ги евидентираат, но нема да постапуваат по нив се' до конечната одлука на Уставниот суд. „Моментно имаме уште малку изјави од судовите, обвинителствата, МАНУ, а во наредниот период ќе ги ставаме на дневен ред изјавите од администрацијата, чија бројка е огромна. Изјавите на министрите се проверени, но ќе треба да ги провериме изјавите на сите воени лица, државни секретари, директори и вработени во агенции, управи, членови на правни и на надзорни одбори, комисии, министерства, факултети“, вели Аџиев.

Претседателот на Комисијата, кој во изминатиот период беше критикуван и обвинуван за селективност, бидејќи, наводно, ги ставал во прв план досиејата на поранешните, а не и на актуелните функционери, ги демантира овие обвинувања. „Воопшто не правевме таква селекција, туку ги закажувавме седниците онака како што ни стигнуваа одговорите од институциите. Сите изјави ги пуштавме за проверка. Зошто другите членови на Комисијата не ме критикуваа? Имаме уште осуммина други членови. Но, секој нека одговара за своите постапки“, коментира Аџиев. (Ж.Х.З.)