Видиковец и три ката за вмровската зграда

На владејачката партијата и' е дозволено да го догради постојното седиште во Скопје и да постави скулптури и видиковец

Деспина Трајковска


Од обична жолта куќа, седиштето на ВМРО-ДПМНЕ уште од годинава може да се претвори во шесткатница со скулптури и видиковец на покривот. Тоа нема да биде нова зграда изградена од темел на друга локација, туку таков лик може да добие постојното седиште на партијата, со последната верзија на урбанистичкиот план. Оспоруваниот најнов ДУП „Мал ринг“ дозволува сегашниот трикатен објект, препознатливата, но ни малку репрезентативна зграда на владејачката партија, да добие во висина и во габарит и да си го украси покривот.

Можеби некој ќе рече дека надградбата на централата на ВМРО-ДПМНЕ не е ништо ново, но дефинитивно, се лаже. Овој пат, на партијата и' е дозволено налик на идеите за покривите на зградите на плоштадот, да постави содржини за украсување на врвот од зградата. Врз неа, како што е објаснето во писмениот дел на последната верзија на планот, може да се постават архитектонски-естетски декоративни обликувања, надвишувања кои нема да се пресметаат во бруто развиената површина на зградата. Потенцијалниот идеен творец на старо-новата зграда на седиштето на партијата ќе може да предвиди и изградба на видиковци на покривот.

Дали сето ова навистина ќе се реализира и кога, зависи само од партијата на премиерот Никола Груевски. Оттаму велат дека и досега имале таква можност, со исклучок на неколку елементи кои се дозволени со последните измени на урбанистичкиот план. Наводно, во ВМРО-ДПМНЕ засега воопшто не размислуваат за подновување на зградата. Дали, можеби, ќе почекаат да го завршат „Скопје 2014“ и од каде им доаѓаат идеите за владиниот урбанистички проект, од партијата не прецизираат. Портпаролот Александар Бичиклиски вчера тврдеше дека немаат никакви планови.

„Деталниот урбанистички план, конкретно, за нашиот објект не значи ништо ново. И досега можевме да го надградиме, но не го сторивме тоа“, кусо ни изјави вчера Бичиклиски.

Како и да е, и делумна реализација на замислите и дозволените интервенции за седиштето на партијата, веројатно, би значеле и подобри услови за работа во партијата. Сегашниот објект со постојната фасада, генерално целиот изглед и функционалност, не соодветствува за партија која во последниве две години ги влече конците за урбанистичко уредување на центарот на Скопје.